1 ԲԱՑԱՏՐԱԳԻՐ
Ու՞ր հասանք, ու՞ր ենք գնում
Ուղիղ մեկ տարի առաջ լույս տեսավ Layout-ի առաջին համարը:
Հետադարձ հայացքով փորձում ենք վերլուծել և հասկանալ՝ ի՞նչ փոխվեց,
ի՞նչ ավելացավ ոլորտում, ի՞նչ կարողացանք անել և արդյո՞ք արեցինք այն
ամենը, ինչ ի սկզբանե ցանկանում էինք:
Կարծում ենք, որ բոլոր բարդությունները և թերությունները հաշվի
առնելով՝ սա մեծ քայլ էր: Վերջապես Հայաստանում հայտնվեց այն
պարբերականը, որի կարիքը շատերս էինք զգում: Հավատացեք՝
շատ դժվար էր ամեն ամիս ապահովել բավարար քանակի որակյալ
բովանդակություն՝ ունենալով չափազանց սեղմ ռեսուրսներ
թե՛ մարդկային և թե՛ ֆինանսական: 12 համարների մեջ մենք
հրապարակել ենք նախագծեր Իսպանիայից, Ֆրանսիայից, Մեքսիկայից,
Պերուից, Ռուսաստանից, Լատվիայից, Թուրքիայից, Գերմանիայից
և Չինաստանից: Փորձել ենք գտնել այնպիսի նախագծեր, որոնք
ժամանակակից են, հետաքրքիր և նորարարական, սակայն ոչ այնքան
հայտնի, նախագծեր, որոնց դժվար թե հանդիպեիք առօրյա news-
feed-ում:
Միևնույն ժամանակ փորձել ենք կարևորություն տալ
ճարտարապետական տեքստին՝ վստահ լինելով, որ տեքստը գծագրից
ոչ պակաս ուժ ունեցող գործիք է մասնագիտության մեջ: Տեքստերը
չափազանց տարբեր էին՝ ճարտարապետների առօրյա մտորումներից
մինչև ժամանակակից ճարտարապետության տեսությանը վերաբերող
նյութեր:
Layout-ը նաև հարթակ դարձավ ուսանողների համար, որոնք
հնարավորություն ստացան ընթերցողներին ներկայացնել
իրենց նախագծերը: Ի վերջո այս ամենի թիրախային լսարանի
մեծամասնությունը հենց ուսանողներն են և երիտասարդ
ճարտարապետները, այն մարդիկ, ովքեր նոր են կազմավորվում որպես
մասնագետներ, և մենք մեծ հույսեր ունենք, որ այն ամենը, ինչ մենք անում
ենք, իր ազդեցությունը կունենա ապագայում, կդրդի ավելի շատ կարդալ,
հետաքրքրվել, ուսումնասիրել ու չմնալ պարփակված հայաստանյան նեղ
իրականության մեջ: