Ktieb Festa 2020, Każin Banda San Pawl Safi Ktieb 2020, Safi, Malta | Page 75
Każin Banda San Pawl, Safi Festa 2020
Sawlu, wara Pawlu, …
… Appostlu ta’ Kristu
Dun Karm Zammit
Aktar ma taqra l-Atti tal-Appostli u
magħhom taqra wkoll l-Ittri ta’ San Pawl,
indirizzati lid-diversi Komunitajiet Insara
ġodda, aktar titqanqal il-kurżità biex
nagħrfu aħjar lil dan il-bniedem, Lhudi u
Fariżew aħrax u wara Appostlu ta’ Kristu.
Fl-Atti tal-Appostli naraw lil Sawlu
bħala l-ġuvni taħt l-età, li għax ma jistax
igara ġebel jew iħaġġar lil Stiefnu, narawh
iżomm il-ħwejjeġ ta’ min kien akbar
minnu.
Waqt it-tħaġġir ta’ Stiefnu wera
l-ħeġġa tiegħu għal Liġi, li aktar tard,
f’isimha kellu jitlob il-permess biex imur jaqbad lill-
Insara u jarrestahom.
Imbagħad, wara l-Konverżjoni tiegħu, permezz tal-
Ittri tiegħu narawh jiġri ’l hawn u ’l hemm iwassal lil
Kristu. U ma’ dan ix-xogħol bħala Appostlu ta’ Kristu,
huwa kien jaħdem ukoll, speċjalment billi ħaddem dik
is-sengħa li kien tgħallem – kif kienet titlob il-Liġi
Lhudija – is-sengħa tal-ħjata tat-tined,
biex kif jgħid hu stess fit-Tieni Ittra tiegħu
lit-Tessalonikin:
“Aħna ma tgħażżinniex meta konna
fostkom;
il-ħobż li kilna, ħadd ma tahulna b’xejn;
imma lejl u nhar ħdimna u tħabatna u
batejna
biex ma nkunu ta’ piż għal ħadd
minnkom.
Imxejna hekk mhux għax ma għandniex
dritt li żżommuna intom,
imma ridna nagħtukom eżempju biex
timxu fuqu.” [2 Tess. 3,7-9].
Dan hu l-eżempju qawwi li San Pawl, il-Patrun
tagħna, ta’ Ħal Safi, u l-Appostlu, Missier l-Insara
Maltin, jagħtina biex aħna ngħixu bħalu, kollna ħeġġa
għal Alla f’kull ħin u kullimkien.
San Pawl Ħeġġiġna Biex Inkunu Bħalek
U Nimxu Fuq L-Eżempju Tiegħek!
L-imħabba taf tistabar u tħenn;
l-imħabba mhijiex għajjura, ma
tintefaħx biha nfisha,
ma titkabbarx fuq l-oħrajn;
ma tagħmilx dak li mhux xieraq; ma
tfittixx dak li hu tagħha,
xejn ma tinkorla;
ma żżommx f’qalbha għad-deni,
ma tifraħx bl-inġustizzja,
imma tifraħ bil-verità;
kollox tagħder, kollox temmen,
kollox tittama, kollox tissaporti.
L-imħabba ma tintemm qatt.
[1Kor:13:4-12]
73