Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi | Page 71

Każin Banda San Pawl, Safi
Festa 2019
Fi Christen Cachia, li miet traġikament fl-aħjar żmien
ta’ ħajtu f’inċident tat-traffiku fl-4 ta’ Mejju 2019, fl-età
ta’ 31 sena, waqt li kien qed isuq taxi f’San Pawl il-Baħar.
Huwa kien iħobb ħafna lil Ħal Safi u lill-patrun tar-raħal
Missierna San Pawl.
Huwa għamel diversi snin attiv bħala membru fil-każin
tal-Banda San Pawl, fl-armar għall-festa ta’ San Pawl u
anki fix-xogħol tal-piroteknika.
Christen, li kien missier ta’ tifla, Martina ta’ tliet snin,
kien għamel ftit aktar minn sena jmexxi l-kamra tan-nar
ta’ Ħal Safi bħala licensee u kien jaħdem kemm in-nar tal-
arju u wkoll dak tal-art.
Kien ukoll jgħin fl-armar tal-festa.
Christen Cachia
F’Karmenu Zahra, magħruf bħala Nenu ta’ Rożi, li miet fid-29 ta’ Marzu
2019, fl-età ta’ 72 sena. Minn ċkunitu kellu rabta mill-qrib mal-knisja, ma’ San
Pawl u mal-Każin Banda San Pawl.
Fi ċkunitu kien iservi ta’ abbati u kienet l-hena tiegħu jdoqq il-qniepen tal-
knisja fil-kampnar.
Meta kiber għamel żmien jgħin fil-ħdim tan-nar għall-festa u anki kien
jagħti daqqa t’id fil-ħruq, u aktar tard sar wieħed mir-reffiegħa l-aktar akkaniti
tal-istatwa ta’ San Pawl. Baqa’ jieħu sehem fil-purċissjoni ta’ San Pawl sas-sena
li għaddiet, iżda fl-aħħar snin kien jieħu forċina. Imma l-vara ma ħallieha qatt.
Nenu Zahra kien ipprofessat fil-fratellanzi tar-Rużarju u tas-Sagrament
f’Ħal Safi u wkoll f’dik Tal-Karmnu fiż-Żurrieq peress li kien devot kbir ukoll
tal-Madonna tal-Karmnu. Kien jieħu sehem f’kull purċissjoni bħala fratell u
jilbes skont il-festi rispettivi.
Huwa għamel żmien twil fil-Kumitat Ċentrali tal-Każin Banda San Pawl
Safi, u anke serva bħala delegat tal-banda. Barra minn hekk ta sehem fix-xogħol
li sar meta twaqqa’ l-każin l-antik u nbena dak ġdid.
Kellu mħabba kbira lejn San Pawl tant li qabel daħal l-isptar, fejn ħalla dan
il-wied ta’dmugħ, mar sellem għall-aħħar darba lill-istatwa ta’ San Pawl fin-
niċċa u m’hemmx dubju li issa qed igawdih fis-sema.
Bil-mewt tiegħu żgur li Ħal Safi tilef persuna dħulija, ċajtiera, b’valuri sodi
u li kienet taf tmur tajjeb ma’ kulħadd.
Nenu Zahra
L-imħabba taf tistabar u tħenn;
l-imħabba mhijiex għajjura, ma
tintefaħx biha nfisha,
ma titkabbarx fuq l-oħrajn;
ma tagħmilx dak li mhux xieraq; ma
tfittixx dak li hu tagħha,
xejn ma tinkorla;
ma żżommx f’qalbha għad-deni,
ma tifraħx bl-inġustizzja,
imma tifraħ bil-verità;
kollox tagħder, kollox temmen,
kollox tittama, kollox tissaporti.
L-imħabba ma tintemm qatt.
[1Kor:13:4-12]
90 Sena Soċjetà 1929-2019
30 Sena Banda 1989-2019
175 Sena Statwa Titulari 1844-2019
69