Քաղաքային տրանսպորտի վիճակը
Այո, Դիլիջանն այն եզակի քաղաքներից է, որտեղ աշակերտներն ու ուսանողները կարող են երթևեկել 30 դրամով ։ Հայաստանի այլ քաղաքների համեմատ այստեղ տրանսպորտը համեմատաբար ավելի բարեկարգ վիճակում է գտնվում ։ Երբեմն տոներին երթուղիները սպասարկվում են անվճար ։
Չնայած այս ամենին, Դիլիջանի քաղաքային տրանսպորտի սպասարկման ոլորտն էլ զերծ չի մնում բազում խնդիրներից, որոնք հաճախ բնակիչներին դժգոհության առիթ են տալիս ։ Ամռանը բողոքներ կարելի է լսել բաց դռներով երթևեկելու մասին, ձմռանը ՝ ավտոբուսը ոչ օրինական կերպով գազով ջեռուցելու մասին ։ Դժգոհում են վարորդների վերաբերմունքից, երթուղիներից, սպասարկման ժամերից …
Որպես վառ օրինակ` ահա այսպիսի գրառում գտանք մեր քաղաքացիներից մեկի կողմից.
« Այսօր Դիլիջանի քաղաքային ավտոբուսում իմ չորս տարեկան աղջկա հետ նստած եմ: Ավտոբուսը կանգ չի առնում մեր կանգառում ու առաջ է անցնում: Ես հարցնում եմ.
-Չե ՞ ք կանգնում կանգառում:
Վարորդը կոպիտ տոնով պատասխանում է:
-Բա մի հատ տեղիցդ շարժվի, որ իմանամ իջնող կա, որ կանգնեմ:
Ասում եմ.
-Ավտոբուսը, անկախ նրանից
իջնող կա, թե չէ, պետք է բոլոր կանգառներում կանգնի:
Վարորդը պատասխանում է.
-Դա քո կարծիքով, մեր օրենքներն ուրիշ են ։ Ես նայում եմ հայելիով, եթե հետևում շարժվող մարդ չկա, կանգառում չեմ կանգնում »:
Հուզող հարցերի պատասխանները գտնելու համար « Կորիզ »-ի թիմը այցելեց Դիլիջանի համայնքապետարան ։ Պարզվում է, որ քաղաքի տրանսպորտային եթուղիները սպասարկելու համար ամեն երեք տարին մեկ իրականացվում է մրցույթ, այսինքն ՝ սպասարկող ընկերությունը ընտրվում է մրցույթի արդյունքում ։ Հետաքրքիր էր նաև, թե ինչու չկա երթուղի դեպի Կամո փողոց ։ Ըստ համայնքապետարանի ներկայացուցչի բացատրության ՝ պատճառն այն է, որ տվյալ փողոցը սպասարկելու համար նախատեսված մրցույթին ոչոք չի մասնակցում ։ Իսկ ինչ վերաբերվում է առկա այլ խնդիրներին ՝ համայնքապետարանը պատասխանատվություն չի կրում, քանի որ ամենը սպասարկող ընկերության ենթակայության տակ է ։
« Կորիզ »-ը փորձեց պարզաբանումներ ստանալ նաեւ Դիլիջանի հասարակական տրանսպորտի համար պատասխանատու « Դիլտրանս » ՍՊԸ-ի գործադիր տնօրեն Էմին Մարկարյանից ։
Առաջնահերթ քննարկվեց հանրային ավտոբուսում անօրինական կերպով բնական գազի օգտագործման մասին լուրերը ։ Այն չի հերքվում ։ Բացատրվում է նրանով, որ անցյալ տարի գազը միացվել է-30 աստիճան ջերմաստիճանի պայմաններում ավտոբուսի անխափան աշխատանքը ապահովելու համար ։ Դեպքը կրկնվեց նաեւ այս տարի, երբ եղանակային պայմանները շատ ավելի բարենպաստ են ։ Ըստ շրջանառվող լուրերի վարորդը ազատվել է աշխատանքից ։
Հարցը, թե ինչու են ավտոբուսի վարորդները ամառվա շոգ օրերին բաց դռներով երթևեկում, պարզաբանվեց այսպես ․ շոգ օրերին, ավտոբուսից օգտվող քաղաքացիների հորդորով պատուհանների հետ միասին, օդափոխություն, զովություն ապահովելու նպատակով բացվում է նաև ավտոբուսի առաջին մասում գտնվող դուռը, որը իրենից վտանգ չի ներկայացնում, քանի որ քաղաքացիները իրավունք չունեն այդ մասում կանգել ։ Չնայած նմանատիպ պատասխանին, կարծում ենք, որ նույնիսկ եթե օդափոողությունը անչափ անհրաժեշտ է, ապա ուղևորների ապահովության համար վարորդը պարտավոր է փակել հետնամասի դուռը ։
Քաղաքի որոշ ծայրամասային թաղամասերում ավտոբուսների ամբողջ գրաֆիկով չաշխատելու հիմնական պատճառը համայնքային անբարեկարգ ճանապարհներն են ։
Մյուս կողմից, ոչ ոք չի կարող հերքել հանրային տրանսպորտից օգտվող քաղաքացիների անբարյացակամ և անպատասխանատու վերաբերմունքը ավտոբուսի նստարանների, վարագույրների հանդեպ ։
Եկե’ ք մենք էլ պատասխանատվություն կրենք մեր քաղաքն ավելի բարեկարգ դարձնելու գործում ։
6