E BENEFISIO DI TIN UN RATU PA NOS MES!
BO SALÚ
Mango: Ora e mango ta hechu, e ta ofresé gran kantidat di vitamina A, B i C. Benefisionan pa e kurpa ta manifestá den un sensashon di vitalidat. E ta duna energia i ta yuda kontra strès. Mango ta hopi bon pa problema ku kueru i pa rekuperashon. E zür ku e ta kontené i vitamina B5 ta regulá e metabolismo di e karbohidrato i di e aminozürnan.
Milon: 100 gram di milon ta mas ku mitar di e dosis di vitamina C ku ta rekomendá diariamente. E ta tambe un bon fuente di beta carotene. E grado haltu di awa ku e fruta aki tin ta stimulá e nirnan pa nan funshoná mas efisiente. E ta riku na vitamina C. Infushon (te) di su pipitanan ta ser uzá komo un remedi natural kontra problema ku nir o blas.
Noni: Noni ta un fruta natural, no un remedi, kual su nòmber sientífiko ta Morinda Citrifolia. Ora e fruta ta hechu, e tin mesun tamaño ku un batata i tin koló hel ku ta bira blanku ora e hecha. Noni ta atribuí benefisio pa salú ku ta ser lográ pa e sinergia di su komponentenan. Miles di hende rònt mundu a duna testimonio di efektividat di e fruta maraviyoso aki.
Ta nesesario nota ku noni primordialmente ta oumentá defensa di e kurpa. Un kurpa ku bon defensa por kombatí diferente tipo di enfermedat. Den otro kasonan, manera p.e. kanser, e por yuda kontrolá biramentu di kabes kousá pa kimoterapia. Noni ta ser uzá pa alimentashon den diferente forma manera, djus, píldora, tablèt i té. Nan ta uz’é tambe pa laga herida di operashon sera mas lihé.
Papaya: Mitar papaya tin mas vitamina C ku e kantidat ku un adulto tin mester diariamente. Na mes momentu e ta aportá na kantidatnan chikí di kalsio ku heru. E djus di papaya ta kontené papaína ku ta un ènzim ku ta similar na pepsina humano, ku ta kibra e proteinanan i ta faboresé e proseso digestivo. Di su mes e tin karakterístikanan analgestiko i su uzo medisinal a ser probá pa kalma dolor di inyekshonnan den espina dorsal wesu di lomba. Igual na otro frutanan ku tin pigmentashon oraño, e ta un ekselente fuente di beta carotene.
Patia: E tin efekto refreskante i ta pone bo uriná o saka vògt. E ta adekuá pa dietanan pa baha di peso, inkluso e por ta un kuminda pa diabétikonan o hendenan ku malesa di kurason, pa su kontenido abou di kaloria. E ta kalma set di esnan ku ta malu ku keintura. E ta neutralisá gas den intestinonan, bronchitis króniko i ta mehorá anemia. Su karakterístikanan di limpia sanger ta ser rekonosé pa komé mainta. E ta rekomendabel ora tin problema ku nir o den kanalnan urinario. Ta ser uzá hopi den dietanan pa bahamentu di peso. Su konsumo ta produsí un sensashon di ta sasiá. E fibra ku e ta kontené ta yuda limpia e intestinonan. E ta
faboresé eliminashon di tóksikonan ku a keda tras.
E ta yuda mantené e bon preshon den e ardunan.
(Ekstrakto di 2 artíkulo skibí pa Sr. Melly
Bergland, Sikólogo Neuro Lingwístiko
i Konsehero di Peso)
Algun fruta ku ta
sumanente bon pa bo salú