Artíkulo kortesia di abogado
Mr. A.V.G. Rooijer,
Korte ta sigui trata diferente kaso den kua ta pidi pa disolvé i/òf destruí akuerdonan manera di hür, laboral òf di tarea. Siman ku ta tras di lomba Korte a dikta sentensia den un kaso kaminda a pidi pa destruí un akuerdo di kompra pa motibu di kibokashon.
T’asina ku un kumpradó den nesesidat hopi urgente di un kònteiner a disidí di kumpra esaki via di un wèpsait ku ta promové benta. E bendedó a propagá e kònteiner i sigurá ku esaki tabata den hopi bon estado. E kumpradó a konfia riba palabra di e bendedó i a paga e montante kompletu ku e bendedó a pidi pa e kònteiner. Sinembargo, ora a ku e kumpradó a risibí e kònteiner el a konstatá ku esaki tabata den hopi mal estado. Esaki a trese kuné ku e kumpradó a manda e kònteiner e mes dia bèk pa e bendedó. Tambe e kumpradó a destruí e akuerdo di kompra por eskrito i eksihí e montante bèk ku e la paga pa e kònteiner.
Mirando ku e bendedó a ninga di hasi esaki, e kumpradó a kuminsá un kaso den Korte pa destruí e akuerdo di kompra. E la alegá ku si e tabata sa ku e kònteiner tabata den dje mal estado ei, e lo no a kumpr’é. E bendedó di su banda a alegá ku e kònteiner tabata den bon estado i ku ta e kumpradó mes a disidí pa no bin inspekshoná e kònteiner promé ku a kumpr’é, apesar di su obligashon a base di lei. Wes sinembargo a haña motibu pa destruí e akuerdo di benta. Wes a konsiderá ku e kumpradó a kibuká su mes ora di sera e kompra.
E kibokashon segun e wes tabata basá riba loke nan e bendedó a bisa di e kònteiner, e potrètnan i e bon propaganda ku e bendedó a hasi. Sinembargo, ora a risibí e kònteiner, su estado a resultá totalmente opuesto na e loke e bendedó a bisa di dje. E echo ku e kumpradó no a hasi sufisiente investigashon tokante e kònteiner ta pisa segun wes hopi mas ménos, ku e obligashon ku e bendedó tin a base di lei pa partisipá e estado real di e kònteiner na esun ku ke kumpr’é. Esaki a hiba wes na destruí e akuerdo di kompra i sentensiá e bendedó na paga e montante bèk na e kumpradó. Tambe e bendedó mester a paga tur otro gastunan.
Finalmente por bisa ku e veredikto aki ta unu hopi interesante ku fásilmente por keda usá den otro kasonan, manera di kompra di un vehíkulo. Si esaki resultá kontrali na e lokual a ser propagá, defektuoso, ta posibel pa destruí e akuerdo di kompra a base di kibokashon. E bendedó e ora ei tin obligashon di paga e montante bèk.
Artíkulo kortesia di abogado
Mr. R. Conquet
RC LEGAL
Mahaaiweg no. 9A
5270622-7880151