Kiko protekshon di datonan personal por nifiká pa e konsumidó?
Na 2011 aña gobièrnu a bini ku un ordenansa di lei pa protehá datonan personal. E ordenansa di lei aki ta basa riba e derechi di privasidat kual ta ankra den nos areglo di estado i diferente otro tratadonan di derechinan humano ku Reino Hulandes (i Kòrsou tambe) ta mara na dje. Den kuadro di esaki, e lei aki ta kontené reglanan ku ta brinda un protekshon struktural na e siudadano pa ku e prosesamentu di datonan personal. Instansianan gubernamental i kompanianan ku ta prosesá datonan personal mester kumpli ku e lei aki. Esaki tambe mester ta e kaso si un konsumidó òf kliente su datonan personal wòrdu prosesá, por ehèmpel ora e sera un kontrakt di Internet. Den e sobra di e artíkulo aki lo sigui referí na e konsumidó òf kliente, apesar ku e lei aki ta protehá privasidat di tur siudadano.
Kondishonnan
Konforme e lei aki, prosesamentu di datonan personal a base di religion, rasa, bida seksual òf otro base en prinsipio ta prohibí. Sinembargo, por prosesá dato a base di e puntonan aki basta ku e kompania tin un meta bon deliniá i hustu pa hasi esaki. Datonan personal ta datonan ku por yuda identifiká un konsumidó òf kliente manera nòmber i fecha di nasementu.
Medida
Ora e ordenansa di lei aki drenta na vigor, e persona òf kompania ta wòrdu pone responsabel pa prosesamentu di datonan personal. Den kuadro di esaki e mester tuma medidanan tékniko i organisatorio pa evitá ku datonan personal ta pèrdè òf wòrdu malusá. Si un konsumidó òf kliente kuminsá duda òf tuma nota di esaki, e por pidi e kompania informashon òf aserka e kolegio ku un keho.
Informashon
Promé ku un instansia tuma datonan personal di e konsumidó òf kliente, e mester suministrá informashon di su identidat i di e meta i motibu pa kual e ta tuma e datonan personal na e konsumidó òf kliente. Aparte di esaki, e instansia mester duna informashonnan adishonal na e konsumidó òf kliente pa garantisá ku e prosesamentu di su datonan personal tuma lugá di un forma adekuá i responsabel. . Banda di esaki e konsumidó òf kliente tin e derechi di puntra si, i si ta asina, ku e datonan personal di dje a wòrdu prosesá. E instansia mester duna e konsumidó òf kliente un kontesta amplio por eskrito denter di 4 siman.
Kolegio di prosesamentu di datonan personal
E ordenansa di lei pa protehá datonan personal ta krea un kolegio independiente ku mester supervisá e prosesamentu di dato konforme e ordenansa di lei aki. Un konsumidó òf kliente por aserka e kolegio ku un petishon pa laga e instituto aki investigá si e toma i prosesamentu di su datonan personal a bai segun e ordenansa di lei menshoná. E Kolegio tin e outoridat di sanshoná sierto violashon di e ordenansa di lei aki ku un but.
INTERMEDIO
KORIENTE I GASOLIN
Ku un tanki yen di gasolin lo bo por kore hopi mas tantu ku riba un bateria yená. Un outo eléktriko ta gasta di otro un banda ménos ora ta hasi kalor, loke ta un bentaha na Kòrsou. Laga nos pone riba un rei e diferente gastunan pa tene kuenta kuné, saliendo for di punto di bista ku bo ta kore 15 mil km pa aña, ku bo ta bende e outo despues di 6 aña. Ya ku gastunan di koriente i gasolin ta asina variabel, nos lo laga esei fo’i di e komparashon, ounke ta algu ku mester tene na konsiderashon. Sigur si ya bo tin por ehèmpel pènelnan di solo na kas.
Nos por distinguí gastunan di kompra, amortisahe, kombustibel, mantenshon i gastunan fiho.
Gastunan di kompra
Gastunan di kompra di un outo eléktriko ta relativamente mas haltu ku esun di un outo di gasolin. Ounke e último añanan e preisnan di outo eléktriko ta bahando. Na Kòrsou ya pa algun aña insentivonan a keda duná pa promoshon di kompra di outo eléktriko dor di baha impuesto di importashon riba outonan eléktriko na 0%.
Gastunan di amortisahe
Gastunan di amortisahe (afschrijving) ta dependé di e marka di outo, e modèl, e balor di katálogo, e aña di konstrukshon, e kilometrahe i sigur e estado di e vehíkulo. E amortisahe ta hopi importante pa na momentu ku bo ke bende e outo despues di 6 aña bo tin un indikashon kiko e outo su invershon tabata den e 6 añanan i kuantu sèn bo por pidi p’e ora bo ke bende.
Kombustibel
Gastunan di un outo eléktriko bo por kalkulá dor di dividí bo gastunan di koriente dor di gastunan di elektrisidat pa kWu i e efisiensia di e outo. Mirando ku preisnan di gasolin i di koriente ta fluktua mensualmente, esaki lo ta kalkulashonnan ku mester keda hasi frekuentemente i por impedí abo konsumidó di por tin un bon bista a plaso largu pa ku bo gastunan di bo invershon den bo outo.
Ta konta meskos pa ku e gastunan di outo di gasolin.
Mantenshon i gastunan fiho
Gastunan di mantenshon di un outo eléktriko no ta haltu. E outo usa muchu ménos piesa movibel ku ta gasta lihé. I tampoko mester hasi gastunan regular manera kambia zeta.Despues di 15 mil km lo mester tin un chekeo i mantenshon ku ta hopi mas barata ku un di un outo di gasolin, ku tin motor, transmishon i sistema di brek. Gastunan fiho ta gastunan manera impuesto di outo i seguro. Te ainda na Kòrsou ta solamente e bentaha di importashon tin pa outonan eléktriko. Ta di spera ku pronto mas insentivá lo keda duná na konsumidónan pa asina e opshon di kumpra outo elektróniko ta unu mas viabel.