Editorial
EDITORIAL
Últimamente tin bastante konfushon i konsternashon bou di nos komunidat pa e echo ku Gaming Control Board (GCB) aktivamente i a base di lei a kuminsá regulá e siguiente weganan di gèmbel. Spesífikamente Loterianan di bienes, Bingo i Bon Kuné ta e tres weganan ku pa bo por organisá esakinan, bo mester di un pèrmit di GCB i tambe tene bo mes na rekisitonan ku lei ta stipulá i GCB ta ehekutá.
A base deklarashonnan di GCB nos por mira ku e entidat ta konstatá ku den nos komunidat tin un kantidat eksepshonalmente haltu di weganan di azar tantu ku i sin pèrmit ta keda ofresé. E weganan aki por tin un karakter adiktivo, loke tin su efekto negativo riba salubridat públiko. Adikshon na gèmbelmentu ta sòru pa dislokashon sosial i sosioekonómiko di famianan i sosiedatnan. Tambe GCB a konstatá ku, ku mas frekuensia, ta hasi uso di weganan di azar komo medio pa generá fondo pa realisá bon kousa, pero na gran eskala tambe pa metanan privá. Mirando e gran kantidat di sèn kèsh ku ta anda den kasinonan, rifanan i diferente otro weganan di azar, internashonalmente e aktividatnan aki ta karakterisá komo sumamente suseptibel pa aktividatnan kriminal, labamentu di plaka i finansiamentu di terorismo. Organisadónan di weganan di azar sin pèrmit no ta aportá na entradanan di impuesto, derechinan di pèrmit i léges ku lei ta preskribí. A base di esaki gobièrnu ta sinti e nesesidat pa regulá weganan di gèmbel adekuadamente. Internashonalmente tambe preshon ta kresiente pa regulá e sektor aki debidamente. Regulashon ta kuminsá ku obligatoriamente mester tin pèrmit pa ofresé weganan di azar na públiko.
Fundashon pa Konsumidó ta sostené e kontrol i regulashon di parti di GCB. Sigur mirando ku e regulashon no ta konta pa vershonnan sosial di Bingo i Bon Kuné. Pa esakinan no mester di pèrmit! Pa weganan di Bienes (lòt) i Bingo i Bon Kuné organisá di un forma mas ‘profeshonal’. Kondishonnan i reglanan di kada wega ta optenibel na GCB. E tambe por akudí pa hasi petishon pa pèrmit komo organisadó òf pa kualke pregunta, keho òf denunsia di un konsumidó partisipante. Partisipá na un wega di gèmbel tin rísiko pa e partisipante. Dado kaso e organisadó no kumpli ku e premio bo no tin garantia di premio i bo no por bai reklamá òf duna keho na GCB.
Partisipá únikamente na weganan legal. Den kaso di keho por aserká GCB. Ademas bo por ta sigur ku nos kaha nashonal ta risibí tur impuesto, léges i sènnan di pèrmit i impuesto ku e tin derechi riba dje. Sigur lo bo yuda fundashonnan i asosiashonnan ku realmente ke risibí bo aporte i nan ta usa esaki semper pa un bon kousa. Bo ta yuda tambe protehé e fundashonnan i asosiashonnan aki kontra kompetensia inhustu i al final bo ta yuda kombatí ilegalidat den sektor di wega di gèmbel.
Direktor
Ban
Na produkto i servisio ku nos ta bende i kumpra
PONE
STANDART
Marc Marshall
Pakiko regulá
Bingo, Bon kuné i Loterianan di Bienes?