Kiko protekshon di datonan personal por nifiká pa e konsumidó?
Na 2011 aña gobièrnu a bini ku un ordenansa di lei pa protehá datonan personal. E ordenansa di lei aki ta basa riba e derechi di privasidat kual ta ankra den nos areglo di estado i diferente otro tratadonan di derechinan humano ku Reino Hulandes (i Kòrsou tambe) ta mara na dje. Den kuadro di esaki, e lei aki ta kontené reglanan ku ta brinda un protekshon struktural na e siudadano pa ku e prosesamentu di datonan personal. Instansianan gubernamental i kompanianan ku ta prosesá datonan personal mester kumpli ku e lei aki. Esaki tambe mester ta e kaso si un konsumidó òf kliente su datonan personal wòrdu prosesá, por ehèmpel ora e sera un kontrakt di Internet. Den e sobra di e artíkulo aki lo sigui referí na e konsumidó òf kliente, apesar ku e lei aki ta protehá privasidat di tur siudadano.
Kondishonnan
Konforme e lei aki, prosesamentu di datonan personal a base di religion, rasa, bida seksual òf otro base en prinsipio ta prohibí. Sinembargo, por prosesá dato a base di e puntonan aki basta ku e kompania tin un meta bon deliniá i hustu pa hasi esaki. Datonan personal ta datonan ku por yuda identifiká un konsumidó òf kliente manera nòmber i fecha di nasementu.
Medida
Ora e ordenansa di lei aki drenta na vigor, e persona òf kompania ta wòrdu pone responsabel pa prosesamentu di datonan personal. Den kuadro di esaki e mester tuma medidanan tékniko i organisatorio pa evitá ku datonan personal ta pèrdè òf wòrdu malusá. Si un konsumidó òf kliente kuminsá duda òf tuma nota di esaki, e por pidi e kompania informashon òf aserka e kolegio ku un keho.
Informashon
Promé ku un instansia tuma datonan personal di e konsumidó òf kliente, e mester suministrá informashon di su identidat i di e meta i motibu pa kual e ta tuma e datonan personal na e konsumidó òf kliente. Aparte di esaki, e instansia mester duna informashonnan adishonal na e konsumidó òf kliente pa garantisá ku e prosesamentu di su datonan personal tuma lugá di un forma adekuá i responsabel. . Banda di esaki e konsumidó òf kliente tin e derechi di puntra si, i si ta asina, ku e datonan personal di dje a wòrdu prosesá. E instansia mester duna e konsumidó òf kliente un kontesta amplio por eskrito denter di 4 siman.
Kolegio di prosesamentu di datonan personal
E ordenansa di lei pa protehá datonan personal ta krea un kolegio independiente ku mester supervisá e prosesamentu di dato konforme e ordenansa di lei aki. Un konsumidó òf kliente por aserka e kolegio ku un petishon pa laga e instituto aki investigá si e toma i prosesamentu di su datonan personal a bai segun e ordenansa di lei menshoná. E Kolegio tin e outoridat di sanshoná sierto violashon di e ordenansa di lei aki ku un but.
INTERMEDIO
Fecha di vensementu
E fecha di vensementu mester wòrdu stipulá riba produktonan di konsumo empaketá ku for di punto di bista mikrobiológiko no ta daña fásil i komo konsekuensia no ta forma un peliger inmediato pa salubridat públiko. E fecha di vensementu mester wòrdu stipulá di e siguiente forma: Fecha di vensementu, sigui pa e fecha ku e produkto ainda ta kontené su propio kualidatnan (si e konsumidó a warda e produkto na e forma adekuá). Den e kaso ku durabilidat di e produkto ta dependiente di e forma kon e produkto mester wòrdu wardá , e fabrikante mester indiká esaki tambe riba e lebel. E fecha di vensementu mester wòrdu poné den e sekuensia dia/luna/aña òf den e sekuensia usá na e pais di orígen di e produkto. E dia mester wòrdu indiká ku un number konteniendo dos sifra, miéntras ku e luna mester wòrdu indiká sea ku e nòmber di luna, e abreviashon usual di e luna òf ku un number konteniendo dos sifra. E aña mester wòrdu indiká sea ku e fecha di aña òf ku un number konteniendo e último dos sifranan den e fecha. E fabrikante por stipulá e fecha di vensementu tambe dor di graba e fecha na rant di e lebel bou di e kondishon ku na e rant e fabrikante ta menshoná sikiera e promé lèter di e nòmber di kada luna i menshon di e lunanan tin ku sosodé den e sekuensia usual.
E informashon riba e lebel mester ta sikiera den un di e siguiente kuater lenganan: hulandes, papiamentu, spañó òf ingles.
Fecha di vensementu òf último fecha di konsumo aserkando
Lokual nos ta mira hopi den práktika tambe, ta ku ora produktonan ta kasi yega nan fecha di vensementu òf nan último fecha di konsumo, komersiantenan ta baha e preis di e produkto di un forma drástiko. Tin ora komersiantenan hasta ta ofresé produktonan ku produktonan ku nan fecha di vensementu òf último fecha di konsumo a pasa kaba. Un djus di apel ku tabata kosta Naf. 2.50 awor diripiente ta kosta Naf. 1.00. Òf un paki di buskuchi ku tabata kosta Naf. 3.00 awor diripiente ta kosta Naf. 1.50. Nos ta wak e bòrchi indikando e redukshon di preis i nos ta kla pa kumpra. Den nos opinion ta un ganga nos a haña!
Laga nos sea konsiente! Sigur no kumpra produkto ku nan último fecha di konsumo a pasa. No ta seif pa konsumí e produkto aki mas. Den e kaso ku ta un fecha di vensementu tin riba e produkto, no nesesariamente paso e fecha di vensementu ta kasi yega, e produkto no ta bon. Pues si tin produktonan ku fecha di vensementu i nan fecha di vensementu ta kasi yega, bo por kumpra e produkto sin ku esaki ta sali bo di malu. Tanten bo sa ku lo bo usa e produkto promé ku e fecha pasa.
Pues sigur ta rekomendabel pa siguiente biaha ora bo ta bai supermarket pa hasi kompras, bo wak e fecha di vensementu òf último fecha di konsumo riba e produktonan pa konsumo. Anto si bo ripará ku un produkto empaketá di kome òf bebe no tin un fecha di vensementu poné riba dje, tuma kontakto ku GGD òf ku Fundashon pa Konsumidó i nos lo mèldu esaki na GGD.