Den kuadro di nos tarea pa informá, eduká i empoderá nos konsumidónan, Fundashon pa Konsumidó konstantemente ta fasilitá informashonnan relashoná ku preis i servisio aki na Kòrsou. Durante e periodo di 5 te ku 12 di novèmber, Fundashon pa Konsumidó a anotá preis di wasmashin na 8 diferente establesimentu. E establesimentunan aki ta: Wimco, Coshel, La Curacao, OMNI, Polytronica, Señor Barata, Bon prijs i Building Depot.
Ku e komparashon di preis aki Fundashon pa Konsumidó ta fasilitá konsumidónan den nan proseso pa un kompra konsiente. Ta bon pa menshoná ku Fundashon pa Konsumidó no a tene kuenta ku kalidat òf pais di orígen di e produktonan.
Polytronica tin mas variedat di marka disponibel
Ku un kantidat di 10 marka den stòk, Polytronica ta e establesimentu ku tin un variedat mas amplio di wasmashin disponibel. E 10 diferente markanan aki ta: Blue Star, Frigidaire, Whirlpool, LG, Samsung, Red Star, Westpoint, Speed Queen, Maytag i General Electric.
E dos establesimentunan ku tambe tin variedat di marka disponibel ta WIMCO i OMNI. Na WIMCO Fundashon pa Konsumidó a konstatá un kantidat di 7 diferente marka i na OMNI, un kantidat di 6 marka.
Mas ekonómiko
Mirando e variedat di opshon ku tin riba merkado, Fundashon pa konsumidó a hasi un análisis di wasmashinnan mas ekonómiko basá riba e kantidat di kilo ku esakinan ta tuma.
Semi outomátiko: Si bo ta buskando un wasmashin semi outomátiko di 6 kilo na un preis mas barata, Polytronica ta kaminda bo mester ta. Akinan bo ta haña un wasmashin di e marka Blue Star na balor di fl. 179,- i ku un garantia di 3 luna. Bon Prijs ta e establesimentu ku tin wasmashin semi outomátiko di 10 kilo na un mihó preis. Serka nan, e marka True Wash ta optenibel na balor di fl. 395,- ku un garantia di 3 luna.
OMNI tin e wasmashin semi outomátiko di 12 kilo na un preis mas kumbiniente riba merkado, na balor di fl. 199,- ku un garantia di 12 luna.
Ful outomátiko: Si bo ta buskando un wasmashin di 6 kilo ful outomátiko na un preis mas ekonómiko, OMNI tin esaki na balor di fl. 549,- i ku un periodo di garantia di 12 luna. La Curaçao tin wasmashin ful outomátiko di 10 kilo na un preis mas kumbiniente. Akinan e marka Sonashi ta optenibel, na balor di fl. 750,- i ku un periodo di garantia di 12 luna
Diferensia di preis
Durante di e anotashon di preis aki, Fundashon pa Konsumidó a konstatá algun diferensia di preis entre e diferente establesimentunan. Por ehèmpel, un wasmashin Samsung ful outomátiko (Front load) di 11 kilo ta kosta na La Curaçao fl. 1299,- . Na OMNI esaki ta kosta fl. 1649,- kual tin un diferensia di preis di fl. 350,-. Un wasmashin di marka LG semi outomátiko (Top load) ta kosta na Señor Barata fl. 350,-. Na La Curaçao i Polytronica esaki ta kosta fl. 499,- kual tin komo diferensia di preis fl. 149,-.
Fundashon pa Konsumidó ta konsehá pa hasi un análisis promé ku kumpra un wasmashin, sea semi òf ful outomátiko. Tambe ta konsehabel pa bo ekipá bo mes ku konosementu di e marka, modèl i tambe e posibilidatnan ku esaki ta brinda bo.
Tene na kuenta ku e komparashon di preis aki a wòrdu hasí promé ku e periodo di ‘Black Friday’ benidero. Pues, preisnan i kondishonnan pa loke ta trata wasmashin por wòrdu adaptá na kada establesimentu. Si bo tin pensa di kumpra un wasmashin den temporada di ‘Black Friday’, Fundashon pa Konsumidó ta konsehá bo pa uza e lista aki i asina komprobá pa bo mes si e ofertanan di ‘Black Friday’ ta bale la pena òf nò. Pidi bo lista na via meil: [email protected].