Un mente na tinu
Den un kurpa salú
Ta normal ku nos mente segun añanan ta bai pasando, tambe ta pèrdè algu di su forsa. Esaki no kiermen pa definishon ku bo ta haña demensia, pero ta nifiká mas ku awor nos mester paga mas tinu si kiko nos ta usa pa nos por keda mas saludabel i fet posibel, tantu mental komo físiko.
Kada dia ku pasa ta un regalo di bida, pero kada dia ku pasa nos ta bira un tiki mas bieu. Por parti pasobra nos kondishonnan di bida a bira konsiderablemente mas mihó, pero tambe awor nos sa mas i ta mas konsiente di nos salú i tin tratamentunan muchu mas mihó i avansá. Behes siertamente ya no ta un sinónimo di dependensha, reklushon i soledat. Esei no kita si ku sierto enfermedatnan relatá na behes serka hende grandi ta bira mas komun. Un di nan por ta demensha.
Hopi hende tin miedu di bira demente òf haña demensha, pero den hopi kaso e miedu ei no ta na su lugá. Ku paso di añanan bèrdat nos mente ta bai poko mas atras. Nos poder di konsentrashon ta bai un poko atras, meskos e kapasidat di nos memoria funshonal. I e fasilidat i velosidat ku e mente tabata kapta i asimilá informashonnan, no ta mesun kos mas. Sigur si e tin di traha ku hopi informashon na mes momentu. E poder pa hasi mas ku 2 kos pareu ta bira ménos, i switch bai di un tarea pa otro ta bira poko difikultoso. Pero por lo general nos funshonnan intelektual si ta keda bon, maske nos alkansá un edat respetá.
Sinembargo demensha por pone ku un hende su funshonnan intelektual por bai drástikamente atras.
Sigun un estudio hasi na Hulanda, tin kalkulá ku tin mas di 270.000 hende ku ta sufri di demensha. E chèns pa hende haña e kondishon aki ta subi ku e edat. Segun kalkulo tin mas o ménos 12.000 persona demente ku ta bou di 65 aña di edat. Di e personanan entre 65 pa 70 aña di edat, 2.5% ta sufri di demensha. Di esnan di 90 aña i mas, esaki ta kasi 40%.
Materia Kompleho
Segun un estudio hasi riba e
materia aki, e kantidat di
hendenan ku demensha lo bira
dòbel den e próksimo 30 añanan.
E oumento aki ta wòrdu
prinsipalmente kousá dor di
embehesimentu di e poblashon.
Mas hende grandi ta bin aserka ku
ta pone ku e grupo di riesgo ta
bira mas grandi. No opstante
mester pone aserka ku tin
eksepshonnan. Por bisa ku tin
diferente malesa ku ta duna síntomanan manera demesha, ku eigenlijk no tin ningun relashon ku esaki i ku si ta tratabel i kurabel. E diagnóstiko di demensha eigenlijk ta algu hopi kompleho ku bon mirá ta ora e hende muri i hasi un outopsia por sa 100% sigur ku e hende tabatin dmensha si òf no.
Un hende por tin síntomanan di demensha, pero den realidat por ta algu kompletamente otro. Por ehèmpel depreshon serka hende grandi por laga bo pensa ku ta demensha e persona tin. Señalnan di konfushon òf desorientashon serka hende grandi por tin diferente motibu, for di un simpel deshidratashon te na intoksikashon dor di remedi òf alkohòl. Pero tambe un infekshon serio manera pulmonia, falta di vitamina B12 òf un atake por kousá ku e hende ta kuminsá delirá òf ta
konfuso.