Amiga, Kon ta? “Bon yu, Drùk drùk aki”. Kuantu biaha nos no ta kontesta e frase ei. Bon mirá, dje bon ei nos no por tin e, si kada ratu nos ta “drùk drùk”. Ta bon pa bo sa: Esun ku duna su sesunan poko sosiegu, su salú mental I físiko tambe ta bai dilanti.
E BENEFISIO DI TIN UN RATU PA NOS MES!
Nos tempu a bira asina agitá I purá, ku masha dia 24 ora no ta sufisiente pa tantu kos ku nos tin di hasi òf ku nos tin na nos kabes. Hasi kompra, tene kas limpi, atendé ku e muchanan, ta djis algun pa menshoná. Den banda tin tambe e bida di e smartphone ku ki ora ku ta, ta kita nos atenshon, meskos e página di Facebook ku nos tin pa soshalisá i sa kiko ta pasa eifó. No papia mes dje dilema di tur dia “ki ta kome awe”?!
Nunka e ser humano ta tin tantu ‘prikkels’ asina pa dil kuné manera awendia. Pero bon mirá, ta nos mes ta buska esaki. “Mi Ta drùk” pa hopi hende a para bira mas ku un simpel èksküs. E la bira algu sosialmente akseptabel. Segun e sikólogo Britániko, Tony Crabbe, ta mas fásil pa simplemente aktua riba tur e kosnan di hasi i purba kaba nan, ku hasi eskoho kua/kiko ta bai hasi. Asina tambe nos ta “evitá“ e tarea òf proyektonan ku echt mester wòrdu hasí i/òf nos ta laga nan pa último.
Pa mayoria sikólogo e preshon di “ta drùk òf okupá” ta un adikshon ku hende mes ta imponé riba su mes. E preshon aki parse ta prek nos selebro, pone ku e hende ta sinti un sensashon dushi. Pa nos por tòg hèndel e preshon di tantu ko’i hasi, un mente kreativo a pensa e konsepto di “MULTITASKING”. Ep miéntras nos ta wak televishon, manda meil ora ta labando paña i papia na telefon i stür. Aunke e hende ta kere di e forma aki e ta resolv’é e problema di tin hopi ko’i hasi, sikiater i sikólogonan ta aklará ku Multitasking ta nada mas ku un mito, paso nos mente no ta funshoná asina.
Atenshon fragmentá
Ora nos ta kere ku multitasking, pues hasi 2,3 kos
pareu ta yuda e kousa, Loke ta pasa en realidat
ta ku gewon nos ta switch di un kos bai na otro.
(Hopi biaha sin kaba esun tampoko).
E atenshon dividí aki, e kambio konstante,
eigenlijk ta kosta nos mente, nos
selebro i nos kurpa mas energia pa
kua nos mente no por asimilá
tur kos dje lihé ei i
konsekuentemente nos tin
mas tantu chèns di
kometé un eror den loke
nos ta hasiendo e
momentu ei.