Awendia hopi di nos konsumidónan ta kumpra produktonan lokal. Produktonan ku nos mes hendenan ta produsí ku nan propio materialnan. Kumprando produktonan lokal no solamente bo ta apoyando nos talentonan lokal pero tambe bo ta aportando na nos ekonomia en general.
Maske e interes pa produktonan lokal ta oumentá dia pa dia, hopi ta e krítika i komentarionan ku produktornan lokal ta risibí na momentu ku nan djis menshoná e preis di e produkto ku nan a produsí. ‘E produkto ta muchu karu’ ta un di e diferente komentarionan ku ta keda duná. Konsumidónan ta kompará e mesun produkto ku ta bin di afó i esun ku ta wòrdu produsí akinan. E komparashon aki, pa ‘Made in Curacao’ no ta kompletamente bálido.
Esaki mirando ku nos produkto lokal tin un kosto mas haltu pa loke ta trata fabrikashon.
Dikon un produkto lokal tin un kosto mas haltu di fabrikashon? Tin diferente motibu pa esaki. Entre otro:
- Nos produktornan mester importá kasi tur nan
materia prima
- Preis pa awa i koriente ta haltu na Kòrsou
- Nos salario ta mas haltu ku otro paisnan produktor
- Nos no tin material pa empaketá na Kòrsou
- Nos isla ta chikí pues e produktor tin ku traha
kantidatnan chikí.
Tur esaki ta pone ku e preis di produkshon ta subi i ku outomátikamente e preis di benta, den algun kaso por ta haltu. Hopi bia nos komo konsumidó ta mira solamente e preis pero no ta para ketu i realisá kuantu trabou un produktor lokal tin ku ehersé pa por pone su produkto na benta.
Bo a lubidá di e benefisionan?
Kumprando produktonan lokal, abo komo konsumidó por tin vários benefisio. Benefisionan ku hopi bia nos no ta konsiente di dje. Por ehèmpel:
- Nos kalidat di produkto mayoria biaha ta mihó i e
produkto mas fresku òf original
- Ku e produkto lokal bo sa òf konosé esun ku ta
produsí
- Nos tin Kontrol di loke ta wòrdu traha
- E produktor ta sòru pa empleo lokal
- Hopi biaha produkto lokal tin mas supstansia ku
esun importá
Poniendo tur esaki huntu ta resultá ku kumpra lokal ta duna e konsumidó mas kalidat i produkto pa kada florin. Ban kuminsá balorá i apresiá nos empresarionan i talentonan lokal. Huntu nos por pone Kòrsou desaroyá positivamente. Ban pe!
Sharella Riedel
Made in Curacao
Sostené Produktornan