AWA
ta bon pa bebe!
Funshon di awa den nos kurpa
Bebementu di awa ta di sumo importansia pa bienestar di salú di hende. Awa ta transportá nutriente i oksígeno na sèlnan den nos kurpa. E ta tene e airu den nos pulmonnan húmedo i ta yuda nos metabolismo funshoná optimal. Awa ta protehá e órganonan vital den nos kurpa i ta yuda nan apsorvé nutrientenan mas mihó. Tambe awa ta regulá temperatura di kurpa, yuda desintoksiká e kurpa i ta protehá i tene nos skarnirnan húmedo.
Benefisionan di bebe awa
Bebe sufisiente awa tin hopi benefisio. E ta yuda kima vèt i kita malestarnan físíko. Bebe sufisiente awa por redusí hamber. Awa ta hidratá bo kútis i ta laga bo mustra mas yòn, e ta duna estímulo pa mihó produktividat di mente i energia pa hasi ehersisio mas mihó. Aparte di e benefisionan ya menshoná awa ta prevení kram i doló di múskulo i ta fomentá un bon humor.
Síntoma i efektonan di falta di awa
Bo por rekonosé ku bo no ta bebe sufisiente awa na diferente síntoma, entre otro: urina koló skur, kueru seku, sentido di hamber konstant i kansansio. No bebe sufisiente awa por kousa, doló di kabes, será di kurpa, doló di múskulo, preshon di sanger inregular, problema ku nir.
Kantidat di awa
Kuantu awa bo mester bebe ta dependé di varios faktor, entre otro bo kondishon di salú, kon aktivo bo ta i unda bo ta biba. Por lo general mas o ménos 1.5 pa 2 liter di awa pa dia ta bon. Pa personanan ku tin diarea òf sakamentu ta bon pa bebe mas awa ku normal pa evitá deshidratashon. Personanan ku ta soda hopi i ta hasi ehersisio tambe mester sòru di bebe sufisiente awa, pa rekobrá kantidat di líkido ku nan ta pèrdè na momentu di ehersisio. Si bo tin pregunta òf duda tokante e kantidat di awa ku bo mester bebe, aserká bo dòkter di kas òf un dietista pa asistensia profeshonal.