Den e último lunanan, nos a risibí señalnan di konsumidónan ku nan ta haña diferente propaganda via sms. E konsumidónan ta eksperensiá esaki komo un molèster ya ku e smsnan aki entre otro por yena bo inbòks òf por tin komo konsekuensia ku sms-an personal ta pèrdè meimei di nan. Kiko e konsumidó por hasi pa pone un paro na esaki? Kiko ta su derechinan den e kaso aki? E kompania di selular tin derechi di bende informashon tokante su number di telefòn na un terser partido pa manda propaganda via sms?
Lei di protekshon di datonan personal (Landsverordening Bescherming Persoonsgegevens)
Dia 1 di òktober 2013 e Lei di protekshon di datonan personal a drenta na vigor na Kòrsou. E lei aki su intenshon ta pa regulá kon kompanianan tin ku atendé ku datonan personal di un persona natural.
Ta importante pa sa si den e kaso ku bo kompania di telekomunikashon ta usa bo number di telefòn selular pa manda bo propaganda, bende bo number di selular na un terser partido pa e terser partido manda bo propaganda, òf manda propaganda pa bo pa un terser partido, si bo number di telefòn ta kai bou di datonan personal manera e lei ta papia di dje. Si e lei ta klasifiká bo number di telefòn den e kaso aki komo datonan personal, a base di e lei bo tin pasonan ku bo por tuma pa prohibí e kompania pa mandabo manda propaganda òf bende bo number di selular na un terser partido pa nan manda bo propaganda.
Datonan personal
E Lei di protekshon di datonan personal ta definí datonan personal komo: tur dato ku tin di haber ku un persona natural identifiká òf identifikabel. Segun e Memorie van Toelichting di e lei, datonan personal ta trata primeramente datonan manera nòmber, fecha di nasementu i sekso di un persona. Si sierto datonan ta desisivo pa ku e manera ku un persona ta wòrdu mirá i tratá den komunidat, nan tambe tin ku wòrdu klasifiká komo datonan personal. Datonan personal pues ta trata identidat òf identifikashon di un persona. Si a base di sierto informashon, sin muchu esfuerso, bo por yega na identidat di un persona konserní, e informashon mester wòrdu klasifiká komo datonan personal.
Kompanianan di telekomunikashon probablemente por identifiká un persona pa medio di su number di telefòn. Sigur pa e personanan ku ta hasi uso di un telefòn post-pago, esaki ta un hecho, komo ku e kliente tin ku firma un kontrato ku e kompania i e kompania por identifiká e kliente a base di bo number. Esaki ta nifiká ku pa e kompanianan di telekomunikashon bo number di telefòn selular ta un dato personal i komo tal ta kai bou di e Lei di protekshon di datonan personal.
PROPAGANDA
VIA
DERECHI I DEBER