95
Loranne Vella Zahra
Mogħtija l-Midalja
għall-Qadi tar-Repubblika
Loranne Vella Zahra twieldet f’Għawdex fl-10 ta’ Ġunju
1971. Hija għaddiet l-ewwel snin ta’ tfulitha fin-Nadur
mal-ġenituri u n-nanniet tagħha. Meta kellha sentejn
u nofs, hija bdiet tattendi l-iskola tat-tfal żgħar għand
is-sorijiet Frangiskani tan-Nadur.
Meta għalqet erba’ snin, hija marret toqgħod malfamilja
tagħha fix-Xewkija. Attendiet l-Iskola Primarja
tax-Xewkija u wara l-Junior Lyceum Agius De Soldanis fir-
Rabat (illum Gozo College Middle School) fejn għażlet li
tkompli tistudja x-xjenza bħala s-suġġett favorit tagħha.
Hija kompliet l-istudji tagħha fix-xjenza fil-livell avvanzat
fis-Sixth Form Sir Michelangelo Refalo f’Għawdex u
wara għażlet li ssegwi l-kors tal-Farmaċija fl-Università
ta’ Malta fl-1990.
Waqt il-proġett ta’ riċerka undergraduate tagħha fl-
1994, hija iżolat, identifikat u semmiet batterju ġdid
li jappartjeni għall-ġeneru Salmonella – imsemmi
bħala Salmonella Gozo – ad unur il-gżira fejn ġie iżolat
il-batterju għall-ewwel darba. Sussegwentement
hija ggradwat b’first class honours fil-Farmaċija mill-
Fakultà tal-Mediċina u Kirurġija fl-Università ta’ Malta
f’Novembru tal-1994.
Vella Zahra kompliet ir-riċerka postgraduate filmikrobijoloġija
medika ġewwa d-Dipartiment tal-
Patoloġija, fl-Università ta’ Malta. Ix-xogħol tagħha kien
jiffoka fuq id-dijanjosi klinika ta’ infezzjonijiet mill-fungus,
fejn kisbet finanzjament lokali sabiex tgħin lill-pazjenti
b’dan il-mard. Bis-saħħa ta’ dan, fl-1995, hija rnexxielha
twaqqaf l-ewwel laboratorju tal-mikoloġija medika
għall-istudji kliniċi u għall-iżolazzjoni u l-identifikazzjoni
ta’ fungi patoġeniċi. Ir-riċerka primarja tagħha dwar
l-infezzjonijiet mikotiċi f’Malta kompliet wara li, fl-1997,
kisbet MPhil b’distinction fil-Patoloġija, fejn ippubblikat
diversi riċerki f’ġurnali internazzjonali. Hija wkoll ħarrġet
numru ta’ studenti Maltin tal-BSc u tal-Farmaċija waqt
il-proġetti ta’ riċerka għall-gradwazzjoni tagħhom, fejn
assigurat li l-mikoloġija ġiet stabbilita fis-setturi kliniċi
kemm dawk pubbliċi kif ukoll fil-privat. Qabel ma bdiet
taħdem fis-settur privat, hija lestiet il-pjan tad-disinn
tal-laboratorju tal-mikoloġija għall-iSptar Mater Dei.
Fl-2014, Loranne Vella Zahra ddisinjat u mexxiet
b’suċċess proġett internazzjonali għall-IAG Group
(British Airwasy and Iberia), sabiex dawn saru l-ewwel
linja tal-ajru tal-merkanzija b’netwerk globali liċenzjat
għat-trasport internazzjonali tal-farmaċewtiċi.
Għal dan ix-xogħol tagħha, fit-13 ta’ Diċembru 2019,
Loranne Vella Zahra ġiet onorata bil-Midalja għall-Qadi
tar-Repubblika fiċ-Ċerimonja ta’ Investitura li tmexxiet
mill-Eċċellenza Tiegħu l-President ta’ Malta George Vella
fil-Palazz, il-Belt Valletta. Unur simili kien ġie mogħti
wkoll lin-nannu tagħha Anġlu Camilleri fis-sena 2014
bħala Uffiċjal fl-Ordni Nazzjonali tal-Meritu.
Vella Zahra ltaqgħet mar-raġel tagħha Adrian waqt li kienu
studenti l-Università u huma żżewġu fil-5 ta’ Ottubru 1997
u għandhom żewġt itfal, Nicole Deanna u Matthew Aidan.
Illum, hija tgħix fir-Renju Unit fejn tmexxi kumpanija tagħha
ta’ konsulenza dwar il-kwalità farmaċewtika. Hija toqgħod
Londra flimkien ma’ żewġha u uliedhom.