64
Ħidmet l-Għaqdiet Xewkin
Id-direzzjoni
Radju Prekursur
Ir-radju tal-komunità tax-Xewkija
18-il sena ta’ servizz
Għal sena oħra qed nerġgħu nwasslu l-messaġġ
tagħna permezz ta’ din ir-rivista li tiġi ppubblikata
fl-okkażjoni tal-festa tal-Patrun tar-raħal tagħna,
San Ġwann Battista. Nistgħu ngħidu li, kemm
għalina f’Radju Prekursur, u kif ukoll għal ħafna
oħrajn, il-festa tar-raħal ma hiex biss dawn il-ftit
ġranet f’Ġunju, imma l-festa tfisser ġimgħat u anke
xhur sħaħ ta’ preparazzjonijiet.
Minbarra l-iskeda speċjali ta’ programmi fi żmien
il-festa, fil-Milied, fi żmien r-Randan u l-Għid il-Kbir,
u fil-festa tal-Martirju tal-Battista, Radju Prekursur
ixandar ukoll bi skeda iktar limitata matul is-sena
kollha. Ta’ min isemmi li x-xandiriet ta’ Radju
Prekursur ma jaslux biss fi gżiritna, iżda jistgħu
jiġu segwiti mill-erbat’irjieħ tad-dinja permezz
tax-xandiriet fuq l-internet. Tajjeb li nsemmu li
minkejja li forsi xandira tieħu biss ħin pjuttost qasir,
però wara kull programm ikunu involuti diversi
persuni li jkunu ħadmu flimkien biex jippreparaw
u jtellgħu programm li jolqot l-interess tagħkom
is-semmiegħa. Minbarra l-persuna li tkun qed
tippreżenta l-programm, hemm min ikun qed
jirranġa r-recordings u jagħmel l-editing meħtieġ.
Anke l-programmazzjoni fejn tidħol l-iskeda tinvolvi
ħafna ħin u xogħol. Sa mit-twaqqif tal-istazzjon
tal-komunita tagħna fix-Xewkija f’Ġunju tal-1997,
Radju Prekursur dejjem mexa’ bil-ħidma volontarja
ta’ bosta u kull min ta sehmu dejjem għamel dan
bil-qalb u mingħajr l-ebda ħlas. Minbarra li qed
jagħmlu sagrifiċċju dawn in-nies li jagħtu ħinhom
fl-istazzjon, qed jagħmlu wkoll sagrifiċċju l-familji
tal-kontributuri tal-istazzjon, li jissaportjawhom
f’dan il-volontarjat.
Matul dawn it-tmintax-il sena kienu bosta persuni
ta’ kull età li taw ħinhom u l-enerġija tagħhom għasservizz ta’ dawk kollhu li jsegwu Radju Prekursur.
Kellna ħafna persuni, minn għal ftit żmien u oħrajn
li taw snin twal ta’ servizz, u li għadhom jagħtu
dan is-servizz b’mod volontarju biex ikunu ta’
kumpanija b’mod speċjali lill-morda, anzjani u anke
emigranti li ma jkunux jistgħu jieħdu sehem f’dak
li jkun qed jiġri fir-raħal tagħna. Minn hawnhekk
nixtiequ wkoll inġeddu l-appell tagħna biex dawk ilpersuni li jixtiequ jagħtu ftit minn ħinhom b’servizz
għal ħafna oħrajn, jikkuntatjawna biex hekk Radju
Prekursur ikun jista’ jkompli jkun ta’ jsaħħaħ isservizz tiegħu.
Il-ħidma f’Radju Prekursur ma hijiex biss marbuta
fejn jidħlu il-preżentazzjoni tal-programmi. Biex
jkunu jistgħu jittellgħu l-programmi u jitwasslu fi
djarkom, hemm bżonn numru ta’ persuni li jiżguraw
li l-apparat meħtieġ ikun jaħdem kif suppost, kif
ukoll biex titranġa l-ħsara li tinqala’ minn żmien għal
żmien. Nistgħu ngħidu li din ix-xitwa kienet kiefra
iktar mis-soltu mhux biss fejn jidħol l-maltemp, iżda
anke minħabba ħsarat li ġew ikkawżati mis-sajjetti.
Din ix-xitwa, kellna xi apparat li ġarrab ħsarat bissajjetti, liema ħsarat wasslu biex anke kellhom
jitwaqqfu x-xandiriet għal xi ħin. Ħsarat bħal dawn,
kif ukoll manutenzjoni regolari jibqgħu għaddejjin
is-sena kollha, speċjalment issa li biċċa mill-apparat
li qed nużaw ilu jintuża għal numru ta’ snin.
Qabel nispiċċaw ma nistgħux ma nsemmgħux
l-għajnuna ta’ dawk il-benefatturi li jgħinuna
permezz ta’ donazzjonijiet. L-ispejjeż mhumiex
żgħar, għax minbarra l-ħsarat u manutenzjoni
oħra, biżżejjed insemmu ta’ kull sena inħallsu
€450 għal-liċenżja tax-xandir, minbarra liċenzja
tat-transmitter u kontijiet oħrajn. Huwa grazzi
għall-ġenerożità ta’ dawn in-nies li min jeddhom
ikunu lesti li jagħtu xi donazzjoni żgħira, li Radju
Prekursur jista’ jibqa’ għaddej.
Filwaqt li nistednukom biex f’dawn il-jiem speċjali
ta’ Ġunju, tingħaqdu magħna fiċ-ċelebrazzjonijiet
tal-festa, nħeġġukom biex issegwu wkoll l-iskeda
ta’ programmi li qed titħejja għalikom fl-okkażjoni
tal-festi speċjali tal-170 sena mill-wasla tal-istatwa
artistika tal-Battista. Nistiednu lil dawk kollha li
minħabba raġunijiet diversi ma jistgħux jieħdu
fil-funzjonijiet tal-Knisja u fl-attivitajiet li jiġu
organizzati fir-raħal tagħna, biex jingħaqdu magħna
permezz ta’ Radju Prekursur, u hekk xorta jkunu
jistgħu jduqu xi ftit mill-atmosfera li jkun hawn firraħal. Nawguraw lil kulħadd il-festa t-tajba.