Carnival Village lo bira un realidad
ORANJESTAD, Aruba - 5 di september 2013: “E no ta un plan mas, awor e ta bira un realidad”, asina Minister Ing. Mike de Meza a duna di conoce, referiendo na e proyecto di Carnival Village. Awe diabierna 4or di atardi lo basha e muraya abou, pa asina simbolicamente mustra unda e centro di entretenimiento nobo di Aruba lo bini. Minister Ing. Mike de Meza ta considera San Nicolas como un di e pilarnan pa cu eventonan carnavalesco y ta p’esey den su maneho, el a crea e Carnival Museum y awo ta bin e Carnival Village. Na e ultimo aki lo tene e eventonan musical y otro actividadnan tambe den futuro, specialmente pa e hecho cu ta renobando Joe Laveist Sport Park pa promove su uzo mas pa deporte. E proyecto di Carnival Village lo costa mas o menos 6.5 miyon florin y lo sali for di Fondo Desaroyo Aruba. Di acuerdo cu e plannan, e trabounan di construccion mes lo inicia dia 1 di october proximo. “Pa San Nicolas esaki ta algo grandi y p’esey ta importante pa nos celebra esaki tambe, na ocasion di bashamento di e muraya abou. Mi ta warda tur hende, di tur districto, pero specialmente esunnan di pariba di brug, pa join nos na e evento historico aki”, asina e mandatario a enfatisa. Cu bashamento di e muraya abou, ta mustra e compromiso serio pa duna inicio na e proyecto aki, na beneficio di carnaval pero specialmente na beneficio tambe di henter e pueblo di pariba di brug.
Minister Mike de Meza ta invita henter pueblo pa awe 4:00pm
Na e crusada di Bernhardstraat y Lagoweg
2
E-Vespertino.com