Minister Arthur Dowers poniendo un paro na e abuso di parti di adictonan
ORANJESTAD: Adictonan ambulante, conoci como “choller”, pa algun tempo ta terorisando otro hende cu pasa of haci uzo di e parkinglot den e area patras di Mango/Penha/La Moderna den centro di Oranjestad. Dos siman pasa caba Cuerpo Policial a haci un “opruiming” den e area aki, cual a ricibi hopi bon reaccion di parti di comunidad en general. “Nos no ta bay tolera mas cu hendenan pasobra nan ta uza droga, nan ta bisa nan ta malo y nan kier actua manera nan tin mas derecho cu hendenan cu ta traha tur dia duro pa loke nan tin,” Minister di Husticia y Enseñansa, mr drs Arthur Dowers a expresa, añadiendo, “Mi a bisa ta basta!” E dianan aki por a nota movecion den e area menciona, unda cu Prome Minister Mike Eman y Minister Benny Sevinger a uni cu Minister Dowers pa “ruim op de boel”. Asina e tres ministerionan, trahando hunto ta provee mas siguridad y trankilidad den e area unda cu chollernan tabata terorisando bishitantenan, trahadonan y comerciantenan di e tiendanan den y rond di Caya G.F. Betico Croes. Minister Arthur Dowers a bisa cu e ta haya “e hendenan aki hopi grosero” pa e forma cu nan ta actua, keriendo cu nan tin tur cos di bisa riba e parkeerplaats. Nan ta dicidi unda cu e person mag di parkeer, ki ora e
mag di parkeer, nan ta exigi placa pa e luga di parkeer, tambe nan ta laba auto sin permiso y despues kier cobra e doño pa esaki y si e persona no paga nan ta bin cu menasa riba dje, e mandatario a splica. Ademas di e accion di polis, tambe ta tumando luga un limpiesa general di e area. Den cuadro di esaki Minister
Dowers a haci un apelacion nan doñonan di e edificionan bashi pa haci e edificionan limpi y cera nan. Tambe el a pidi pa negociantenan cu ta duna e chollernan saconan di sushi pa tira afo, pa stop di haci esaki como cu e sushi no ta wordo tira den un bari of baki di sushi, pero e saconan ta resulta tur caminda riba caya y den edificionan bashi. “Si bo ta malo no ta duna bo e derecho pa molestia hende. Nos ta mustra nan cu autoridad a dicidi cu e bagamunderia aki a caba!” Minister Dowers a subraya. Cu placer lo acomoda e adictonan cu ta expresa un deseo pa rehabilita y tin e interes y boluntad di parti di tur esunnan trahando den e ramo di husticia, salubridad y gruponan di interesa pa cu adiccion pa yuda e adictonan cu kier sigui un tratamento y kier cambia nan bida, el a expresa. E titular di husticia tambe a splica cu tin dos proceso pa yega na pone un adicto bao di curatela y e parti cu ta toca codigo civil ta funcionando caba y ta wardando pa un cambio den un otro ley cu ta regarda e proceso via di codigo penal pa por cuminsa aplica esaki tambe.
4
E-Vespertino.com