NEVOJNIK
Droge moje Forke i Forani,
niste me vidili danas popodne na Pjacu, a za reć pravo, ne pari mi se da son von vele fali.
Parvi put je da son zakasni na svoju redovitu zimsku rutu od Tajlanda do ovamo. Nison trefi
kupit jeftine korte pok son tuko cekot priliku, jedva son ćapo katamaran i taman son stavi
nogu na forsku rivu kad su na buku od Mandraća užegli nikega cejadina ca je imo bit Jure
Karnevol. Malo son mu se boje zagledo u rilo za kapit ko je, ma nison uspi doć kraju. Cu son
da su mu dali ime Niko jer je niko kriv za sve nevoje ca su agvantale For zodnje vrime. Ko je
kriv ca nered i mafija imaju manicu od taramuta? Niko! Ko je kriv ca smeće upravije sa
našima životima, a ne mi sa smećen i da ga nosimo na kontejner kad je nos voja? Niko! Ko je
kriv ca nimomo strategiju razvoja? Niko! Ko je kriv ca nimoš di kupit postole i špigete u For?
Niko! Ko je kriv ca je pumpa još uvik u Križnu luku? Niko! Ko je kriv ca nimomo starački dom i
zdravstveni centar? Niko! Ko je kriv ca For sve manje pari grod za domoći svit, a sve veće
rezort za furešte? Niko! Bidan niko je za sve kriv i ploti je buletu.
Torno son se iz velega svita i niko me ni doceko. Ma isto son se odluci ošervat vos i vidit kako
ste. Malo son unjul jerbo me nisu pitoli dobro na Tajland. U For puno boje jin, nimo ga do
domoće spize: burgerih na svaki kantun, pizze i koktelih žirafih di god se okreneš. Još kad
seden onamo di je nikad pri bila gustirna na Pjacu, ćutin se kako centar svita. Ma For je
centar svita! Ovode svi dojdedu, otvoridu lokale, cinidu biznis, posli svetega parvega
desetega iskupidu se i gredu ća kako da hi ko goni. E, onda je naše vrime, onda se rasporaju
štramci i kušini i brojidu se devize. Jo son sa svojima devizima iša na Tajland, bome, kako
svako godišće, a moji prijateji, oni ca hi sarbi žep, išli su u Garmišpartenkirhen, Madonu di
Kampiljo, a oni ca su ni se u deveti misec isproznili apartmani su odlucili poć na Kupres.
Poslali su mi sliku da su u Šamoniks, a bili su na Kupres. I to su ti prijateji. Onda su posli
plakoli da je For prozan i da nimoš di poć i da je nojlipje stat u teplo u kuću, otvorit fejsbuk jer
je cili For tamo i jedva cekodu kad će lito jerbo je to nojboji štajun. Prati son na fejsbuk da je
ovode dokli me ni bilo bi i teotar i kućice i kino i kviz i svega se moglo cinit, ali je lipje plakot
mižeriju. Niko je ploti buletu i za oto.
Litos ćemo profeštat 151. godišće turizma i bit će cudo lipo. Otvorit će se teotar i bit ćedu
predstave svaki don. Izgrodit će se sto novih apartmanih i bit će manja gužva na kose jerbo
će se svak toćat u puste bazene ca se cinidu u For. Nećedu vrotit cetvortu palmu na rivu jerbo
se onda neće vidit more iz apartmana. Od vele navalice fureštih tukat će proširit štekate jerbo
su ovi moli, tako da će se proširit po ciloj pjaci do mandraća, a na mandrać će doć ogromno
caklo di će bit stoli i katride i moć ćete mumot jastoge sa pogledon na naše tradicijske kaiće
od plastike. Landane se širidu put Galešnika, jerbo put Fabrike već ni mista, pok će se do
tamo moć na noge. Na Bateriju će Karpej otvorit elitni noćni klub, budući su hi vijećnici potiroli
iz mista. Jeson von reka da smo centar svita?
Vaš Celegat