U For je pri bi kundut na kantun Fontika blizu skalih za Teotar. Tamo je cinila reda, i to dobro, teta Joka. Jedonput je za potribu arivo barba Stipe K. i kako mu štumak ni bi alavija, iznutra se dobro culo šćiketovonje i brumbulovonje. Govori teta Joka:-j o, Stipe, ča ti lipo piva! Ma, pari mi se da si malo dištonan.- A ca biš ti itila? Da ti za dvo dinara kanto Caruso?
*** Barba D. je lavuro kako manovol u poduzeće. Umor je diretur i iša mu je i on na sprovod. Ma jednu desetak metor iza svih drugih. Pitodu ga:- A ca je, D. kako to da si toliko iza svih?- E, bi san mu toliko iza svih i po plaći!
*** Doša Komižani na Broc, pok je iša vidit cimiterje. Na izlasku je inkontro jednu domoću ženu koja ga je lipo zamolila:- Šjor, biste me fregulu kumpanjali, jerbo me je malo stroh, pogotovo sad kad već pado noć. Noc joj je on odgovori:- I mene je bilo stroh kad son bi živ.
*** Govori M. jednoj Bruški nose dosta godičć:- Susida, meni se pari da von je muž bokun iša ća.- A, ćerce moja, on ti je ovakov i doša!
*** Posli jedne puno slabe jematve( a inače je lozja imo cudo malo za njegove potribe garla!), barba G. pritoce vino u konobu. Pasoje susid:- Ca je, je Bog providi?- A evo, moga se stavit i malo boje! Mižerija.- Ma, hoće zavancat do Božića?- Hoće, hoće! Ako Božić ovo godišće primistidu na Mortvi don!
*** Jedon put, kad je barba Toni Bilac imo osandeset pasonih, pari mi se godišće ili dvo pri nego je porti, čakulo son s njin, u điru priko rive. Provjo mi je obo nikin stvorima ca hi je cini dokle je još moga. Na to son mu jo reka:- Ca biste vi barba Toni cinili da von je deset godišć manje?" Na to mi je on odgovori kontron:- Znoš ti moli ca bi jo reka da mi je deset godišć manje? A jo:- Co barba Toni?- Da mi je još deset manje— fini je barba Toni.
Imala je već lipih godišć, ma ćutila se slabo, štumak je muci i odlucila se poć u likora. Naš Želimir je vižito, vidi ca je na stvori i govori ti njoj:- Teta Tone, imote cir na štumak. Da bi bilo alavija, vajote vodit računa obo spizi. Ne smite jist puno, ni žestoko, niti masno. Ona njemu:- Mogla bi te sve to poslušot. Somo, rec mi, kad ću onda moć?
*** Pasoje prid kroj onega rata jedon Forani priko pjace. Na škina mu kašeta, ne propja vela, ma kako on gazi, ne pari ladahna. Pito ga jedon:- Marko, a ca to nosiš?- Ne smin ti reć. Vojna tajna!- A je ti teško?- Ponegaimena, kako neće bit teško kad je municija!
*** Pri barž i 30 godišć doša barba Daretu u Pokonji dol sanitarni inspektor u vižitu. Pito za teplu vodu. Barba Dare otvori špinu, ovi provo rukon, pece. Da neka molo malo da toci. Provo epeta- opari ruku. A bojlera nindera. Inspektor:- A gdje je vama bojler? Barba Dare:- Je vi išćete bojler oli teplu vodu? Ova ne da je tepla nego je vrila, ne morete ruku daržat! Vidi ovi da je na teracu zamotona daleka corna cijev i da se tako tepli voda. Pito:- Kako imate toplu vodu navečer? B. D.:- A, uvecer mi ne lavuromo. Insp.:- Dobro, a kad je oblačno? B. D.:- A koje von to mone od gostih dohodidu ovamo kad ni sunca, an? Ovi se nasmijo i tako je sve pasalo lišo.
*** Pito jedonput u butigu Maja C. našega Jackyja da neka njoj špjego iz njemačkega kako se to i kad duperaju flasteri koje je dobavila za skalat kila. Jacky je odgovori da mu ni potriba štit jerbo da to već dobro zno.- A, onda, rec mi, poslušot ću te!- Kad te ćapo glod vazmeš jedon flaster....- I, di ću sa njim?- Zalip ga priko justih! Vidit ćeš kako ćedu kila hodit dole.
22