Drogi, lipi i sarceni moji,
posli cilih godišće don epeta son doleti ki vami. Svudera son bi i svega son vidi. Kad son leti priko Tajlanda, vidi son puno naših Foranih. Svih vos pozdravijedu i rekli su mi da se epeta vidimo u peti misec. Kako son leti napreda, u brivu son odoćo da je u For po snig. Ma co snig, to je bilo veliko bardo puno sniga, sve bilo kako dres od Hajduka ili kako oni čekovi ca hi certi sakrijedu pod stol. Vidi son i da su u malo i krotko uspili ucinit i žičaru i da hi puno stoji na skije ili sanjke, a još veće za šank. Ma onda son vidi da su me oci privarile( sve radi minusih u ariju) i da piše Madona di Kampiljo i malo daje Garmišpartenkirhen.
Kad son leti priko Jadranskega mora, ćuti son da mi je ništo zadilo za krilo. Propela od helikoptera. Sutradon son prošti u foje da su ukinuli helikoptere. Vas son se ispoti jerbo nison moga reć da son jo kriv, da son ni ruvino propelu kad son bugni u njih i oni u mene. Srića da son višje leti jer da son udri u katamaran ili trajekt ne biste štili ove foje.
Kad son se vroti u For, dopokon son gušto: svaki don son hodi u kazalište, u kino, na koncerte, na utakmice u sportski centar … nison zno okle ću pocet. Parilo mi se da epeta tukon poć u okulista jerbo jedon don nison vidi Galešnik, ma su mi rekli da su arivala dvo kruzera i vapor na novu rivu. I som son se uviri kad son ucini izvidni let. A iz arije apena: ucinili starački dom i industrijsku zonu put Brusja. Sad son kapi noc je Grčić penso kad je reka da je Harvoska izošla iz recesije. Jedno jutro son iša popit kafu u gradsku kavanu u Fontik. Unutra je lipo teplo, moreš proštit friške foje jerbo arivaju sa parvin vaporon iz Splita za For u 7 urih i moreš sa svakin govorit bez stroha da te ko cuje iz stola do tvoga. Onda su mi tote prižentali novega direktora turističke zajednice. U ćakulu son cu da je otvoren muzej Ivana Vučetića na Forticu. Ma ko se usudi reć da se u For ništa ne dogođo?!
Poteštota son, kako i obično, noša u općinu. Bi je malo nervozan jerbo ni imo ideje di će sa pustima šoldima ca je 20 komunalnih redarih uspilo iskupit od kaznih u somo dvo litnja miseca: co od golih, co od pasih, maških, a tote se iskupilo i od kaznih za smeće, auta, motore, bicikle, karoce, rošule i karijole na jednu rodu. Onda son mu reka na uho di bi ote šolde bilo nojboje uložit. Tako mi danas morete zafolit ca imomo škulu i šoping centar iza vrtića. Itili smo poć oto proslavit, ma di? U ovu štajun otvoren je svaki restoran i lokal u For pok je bilo teško odlucit di ćemo poć. Dopokon, išli smo, najili se, popili, zakantali. Ma tu noć me prisiklo priko štumka. Lipo son ni reka da ne jin pomidore iz zimskega štajuna. Uspi son ustat iz posteje i doć na centar. Tote se njih pet izvartilo okolo mene i sad lipo mirujen u cistu i meku posteju, imon tri obroka na don, svaki don me njih šest likorih dojde vižitat i ca god je potriba oni su mi na ruku. Jo son kuntenat covik. Ne znon zoc vi još uvik grintote.
Vaš Celegat
Celegat 2017. parićali: Zorka Bibić, Ivo Buzolić— Lojko, Miki Bratanić, Luky Ljubić, Igor Kolumbić, Tajana Brtičević, Joško Bracanović,“ Zabrinuti”, Mirjana Kolumbić,“ Hvaranin”, Krešimir Marušić, Prošpe Zaninović, Siniša Matković-Mikulčić, Alberto Fortis i oni koje smo zaboravili mencovot... Celegat( i) lustrirali: Siniša Matković-Mikulčić, Ante Kliškić, Joško Bracanović, Pimpek Pao, Nikša Barišić— Art, Davor Maričić Celegat postivo: Siniša Matković-Mikulčić Za sve napisono i nenapisono odgovoro: Rino Budrović Bene Uredništvo“ Celegata” zafalije Dorotu na ustuponju kopije stripa“ Rik & Dirk 3”.
Ako pišete poeziju, satiru, romane, crtate, cinite križaljke ili bilo co ca bi se moglo objovit u“ Celegat” jovte non se na celegat2013 @ gmail. com ili vaše uratke ostavte u Marinkota na šank. Diskrecija zajamčena.
2