mi je čovik nacrta ko je i ča je oma san skužila da ga znan. Ne zato ča je on
poznat u ovemu gradu vengo ča se sa čovikon družin puste godine na refule
al adijo pameti. Oni Austrijanac mi se uvik umiša u posal. Lipi moj
Alchajmer. Nisan ga pripoznala. A oli ja moran svakoga poznat. Ae.
A onda, zapravo prin svega ča će potla bit, onako smišna, ka cukarin, obična,
parilo me se na dodir ruke, da je, je, jema bit lako volit. Zagrlila me i
zagrljajen rekla sve ča jedan amo reć ka zagrljaj more reć. Ondak mi je rekla:
Ajme, kako si lipša uživo vengo na fotke. I kupila me. Je Gospe mi. U tu uru,
uz Savu, uz pršut i ostale bibite ona meni govori da san lipja. Oli je to ča.
Ajme. Otkad mi niko ni reka da san lipa. I kako me neće kupit.
Finila je večera. Krenili smo doma. U autu mi je dala je’nu kutiju i rekla da je
ne otvaran prin neg dojen doma. I da ne lažen, parilo me se kako ja daleko
stojin oli ovi sporo vozi. Nikad doć doma a gricule me čećukaju. Jo ča je
unutra?
Ulizla san u kuću. Oma san kutiju stavila na stol u tinel i ritual je počeja. Jo
ča volin otvarat poklone. Jedva san dočekala. Ajme.
Prvo san je gledala, pa san mislila, mislila. Ne znan ča san mislila. Pa san
guštala gledat fijok i tako bi ga ostavila, ma kvragu, moran otvorit. Skinila
san vrpcu o’zla ta. Sa druge strane stolića je sidija On. Moj muž jedinac i čeka
je da vidi šta je u tu kutiju.
Makla san poklopac, makla san papir i svitu moj. Ka me nije kolpalo sto
godin ću živit. Vjenac. Pravi pravcijati. Ajme vidi rafijole u vrićicu ka za
kumplire. Aaaaa, nu čoviće javora u kolač. Ajme, vidi žuku. Gledan i ne
virujen, sve je stalo u ti vjenac.
Ćutin miris brnistre, soli, kamena. Vonja ditinjstvo, mladost, vonja moja
štrada. Sve me puca u prsa. Jebale me suze. Koji san ja redikul. Oma ka’ se
sitin sebe ja se rasplačen. Ma neka. Manje ću pišat. Plačen ka kiša.
Gleda me muž jedinac. Ništa mu ni jasno. Ne razumiš ti to čoviće. A samo
san jon rekla da donese miris brnistre, pinku sunca i mrvu soli. A vidi sunce
kako žari iz te male kutije. Da male? Ogromne kutije. Peče dušu. Izgorit ću
ako je oma ne zatvorin.. Sve je donila, Gospe mi...
Drćen.
Puca me mladost. U sekundu san tamo. Mašo mi sve to fali. Nisan još
pelcovana. Sve san mislila da me baš briga, Mogu ja brez svega. Je, oš klinac
mogu. Neću ja da priznan. Sve je oto još duboko, duboko ume. A i neka je.
“Tonka, reci cvrčak, Tonka, reci more”. Znaš šta? Obična je. Smišnica jedna.
Pari me se normalna.
Tišćin Dijoklecijanov vjenac u ruke. Šetan kaletama. Trevijen ekipu iz fronte i
lipo mi.
78