NA VOSA NI KALOU KEI NA
BULA NI TABAGONE ENA GAUNA OQO
Vuli 3:
Lesoni: Same 119:9
“Ena vakasavasavataka vakaevei na nonai valavala na
cauravou? Ni sa qarauna ga me vaka na nomuni vosa.”
Na Daunisame o Tevita e wasea eke e dua na dina levu me baleta
na nodra bula nai tabagone kei na nodra veiwekani kei na Kalou.
Ena rawa ga ni ra bula ena bula e savasava kevaka era vakayacora
vakakina me vaka na nona vosa.
Eda sa raica rawa mai ena lesoni sa oti ni Vosa ni Kalou e “vakayalo
ka vu ni bula.” E kenai balebale oqo ni sa savasava vuka. Ena
sega ni rawa ni ko qai vakuria tale ena dua na ka se kauta tani
mai kina e dua na ka me vakasavasavataki kina. E dodonu ga mo
talairawarawa ka vakaio kina.
E dodonu me ra vulica vakalevu na Vosa ni Kalou nai tabagone
ena gauna oqo me rawa ni ra vorata kina na veika vakarerevaki e sa
solia tu mai ko vuravura kei na gaunisala eso ni vakau i tukutuku
sa tu ena gauna oqo. E sega tale ni dua na gauna e nai tukutuku ni
veigauna kei vuravura e sa vakasosataki kina vakalevu na nodra
bula nai tabagone mai nai vakavuvuli kei na rai vakavuravura ka
saga me veisautaka na nodra bula ka vakagaga talega na nodra
vakasama, me vaka na gauna oqo. E vakarerevaki na ka e rawa
ni cakava na mona livaliva ni vakau i tukutuku (social media)
ena gauna oqo. E sa vakadinadinataki ni levu cake na gauna era
vakaraica toka kina nai tabagone ena gauna oqo na nodra talevoni
mai na nodra vakayagataka na nodra gauna ena veika tale eso.
Na ka ga e vakanananu vakalevu kina na yalomu, sai koya sara
talega oya ena moica ka bulia nai vakarau ni nomu rai kei na ka
ko vakabauta.
E dodonu mera kila nai tabagone ni tiko nai vakatagedegede
ni bula vakavuravura ka bibi kina me ra kila talega ko ira nai
vakatagedegede ni bula e dodonu me ra bula kina ka maroroya.
Nai vola nei Paula vei ira na kai Roma wase 12, tikina e 2 e kaya, “Ia
dou kakua ni vakatauvatani kemudou kei ira era sa vakavuravura:
ia dou mataliataki ga ni sa vakavoui na yalomudou, mo dou kila
rawa kina na loma ni Kalou, sa yaga, ka vinaka, ka dodonu sara.”
7