Угтай хүнэй үри гэжэ арадай сэсэн үгын ёһоор Сэсэгма Раднаевна багшанар мэргэжэлтэй ябаһан аба, эжы тухайгаа дулаахан үгэнүүдээр һанан дурсана: « Модошо, түмэршэ дархан, һурагшадтаяа элдэб бүлгэмүүдые эмхидхэжэ һиилэхэ, төөнэжэ, хээлэжэ( выжигание), г. м. элдэб мэргэжэлдэ һурагшадаа һургажа, олон үзэсгэлэнгүүдтэ хабаадагша бэлэй. Эжымнай нарин оёдолшон ябаһан, гадар дотор хубсаһа бултыень оёдог байһан. 3 хүбүүд, 3 басагад, аша зээнэртээ бултандань дэгэл, малгай, гутал бултыень оёдог байгаал даа. Гансахан намдаа 3 торгон тэрлиг, 2 сээжэбшэ дэгэл, арһан дэгэл, малгай, нооһон хүнжэл г. м. бултал хүүгэдтээ оёдог байһан юм даа ».
Бэлигтэй багшын ажал анхарагдажа үндэрөөр сэгнэгдэхэ, тэмдэглэгдэхэ аабза гээд, найдаха дуран хүрэнэ.
Суг хамта хүдэлдэг багшанарай зүгһөө Сэсэгма Раднаевнада шэнэ зуун жэлэй эхиндэ элүүр бэе, эрхим амжалтануудые хүсөөд, гарахаяа байһан түмэр морин жэлдэ мүхэшэгүй зоригтой, гэр бүлэдөө ажана амгалан, жаргал дүүрэн ябахыетнай хүсэнэб.
2000
БУРЯАДААР ЗҮЖЭГӨӨ ТАБИЯЛ!
X. Намсараевай « Сагаадай мэргэн хүбүүн Ногоодой сэсэн басаган хоёр » гэһэн ульгэрэй удхаар найруулагдаһан зүжэгые « Үльгэр » театрта олон эдир харагшад хараба, баясан сэгнэбэ гээшэ.
Зүжэгэй уран гоёор шэмэглэгдэһэниинь, хүгжэмынь бултанай сэдьхэл баясуулна. Бэлигтэй зүжэгшэд үльгэрэй Баатарнуудай рольнуудые эрхимээр гүйсэдхэжэ, бултанай һайшаалда хүртөө. Анхандаа, буряад зоной үмдэдэг гоё һайхан торгон дэгэл, шэмэг зүүдхэлнүүд харагшадай нюдэ баясуулна. Тус үльгэрые зохёон найруулагшадта гүнзэгы баяр хүргэе.
Аяар холын Украинын хотонуудаар тус театрайхид аяншалжа, буряад арадайнгаа үльгэр түүхэ, соёлтой танилсуулха золтой байгаа.
Бидэ, наһатай болоһон зон, энэ үльгэрые уншажа, үндыһэн гээшэбди. Үльгэрэй удхаар зүжэг харуулхань гэжэ дуулахадаа, ехэл һонирхожо хараха зуураа, сэдьхэлдээ нэгэл гунигтай үлөө һэм. Хэршье бэрхээр оршуулжа, удхыень гаргажа шадабашье һаань, эхэ хэлэнһээ таһаршахадаа, анхилма һайхан шэмэг үгэнүүднай, уян зоной сэдьхэлээ долгилтор хүлгүүлдэг дабтагдашагүй онсо няагаатай X. Намсараевай үгэнүүд үгыл даа.
Мүнөө эгээл эндэһээ, энэ театрһаа эхилжэ, эдир манай халаан эхэ буряад хэлэеэ шудалха ушартай гэн гэһээ, холын түүхэ, үндэр эрдэм соёлтой байгаад, түрэл хэлэн дээрээ хөөрэлдэжэ шадахаяа болижо, арадайнгаа үни холоһоо абажа ябаһан нангин хэлэеэ орхижорхихомнай хэды хойшолонтойб, гомдолтойб? Энэмнай асуудалай ехэ асуудал гээшэ ааб даа.
142