ЭХЭ НЮТАГ ХӨӨРХЭМНИ Книга эжи | Page 39

баян һуудаг байһан юм. Ухаагүй зон зөөригүй, айлай барлаг боложо, хоолойгоо
тэжээдэг һэн» - гэхэ.
«Угаа уһанда хаядаггүй» гэдэгтэл, шимни эхэ эсэгынгээ сагаан буян дүүрэн
эдлэжэ, найман Намсарайдал үри зөөреэр тэгшэ баян, бэлиг түгэс, алдар нэрэтэй,
элүүр энхэ, зохёохы ажалайнгаа жолоо баринхай ябахадаш баясадагби. Хододоо
хошон зугаа энеэдэтэй ябаха шинии онсо илгарма абари зан. Шог зугаа дэлгэжэ,
сэдьхэлдээ сэбдэгтэйш ябаа һаа, мартажархихаш. Хүн бүхэндэ үгтэдэггүй бэлиг
гээшэ ааб даа.
Нютаг нугадаа хүндэтэй, үнэн сэхээр ажаллажа, гүрэн түрын «Онсо
кинематографии СССР» гэһэн үндэр нэрэ зэргэдэ хүртөөш. Бэшыень мартааб.
Эхэ эсэгынгээ нэрэ сэгнэжэ, сахижа ябахаһаа үлүү юун байхаб даа. Олон
үринэршни бултал дээдын мэргэжэлтэй: багша, эрдэмтэн, хүдөө ажахын
мэргэжэлтэд Буряадайнгаа нютагуудаар түбхинэжэ, олоной эжы, абанар
болонхой.
Зунай зулгы сагта үбгэ эсэгынгээ гал гуламтада сугларжа, амаржа, Хужартынгаа
эм домто нуурта шунгажа, хүгшэн эжынгээ бэлдэһэн сагаан эдеэн дээрэ бэежэжэ,
далижажа бусанад гээшэл даа. Бишни аша, зээнэрэйш тооеньшье мэдэхэгүй,
танихашьегүй байнаб, хүлисөөрэй. Дансаранай үхибүүд ехэл һургаалтай гэлсэгшэ
хамнай. Дэнсэмашни нагаса эгэшэн түһөө, зулгыхан зан абанхай гэжэ һанадагби.
60 наһанайш жаргалта һайхан үдэр танайдаа үндэр айлшад, үетэн нүхэд, хүршэ,
түрэлхид айл аймагтаяа сугларжа, бултадаа баясажа хүхижэ тараа хамнайбди.
Сасуутан хамтаржа, дүрэ зурагуудаа буулгуулаа һэмди. Мүнөө хайран үетэн
Жэгжэдмамнай Бурхандаа ябашоол даа. Харахадам, үхибүүд, аша зээнэрынь
хүнэйл эрхимүүд ябадаг, баясадагби.
Дансаран, юундэ Роза нам тухайгаа уянгалан дурсашабаб гэжэ бү һанаарайш.
Шам тухайгаа бэшэхэдээ, аяар холын үхибүүн наһандаа бусаһан шэнги мэдэрнэб.
Уулзажа, хөөрэлдэһэн шэнги болоноб. Хожом хойно найман үхибүүдшни, аша
зээнэршни шам тухайгаа уншахадаа, тэршээхэн зангыеш ойлгоходоо, баясахал
даа. Намһаа бэшэ хэншье шинии бага наһыеш мэдэхэгүйл даа. Нютагаархиднай,
залуу үетэн һонирхожо уншаха гэжэ найданаб.
Һайхан һанаатай
Нютагай үбгэн гэгдэжэ,
Үндэр наһанай жаргал эдлэжэ,
Он жэлэй ошохо бүри
Омог дорюун зандаа,
Урматай, баяртай хододоо,
Олон үри хүүгэдтээ
Заабари һургаалаа хэлэжэ,
Амгалан тэнюун һуухыетнай үреэе!
1998
41