Зохёолшон зүн бэлигээрээ мэдэржэ, үнэхөөрөө үнгэрэгшэ жэлэй намар Хэжэнгэдэ Джарун Хашорой субарга мүндэлжэ, олон зоной, Ороной ахамад ноёдой хабаатай баярай оршондо мүргэл, үргэл хэгдээ бэлэй. « Буряад-монгол угсаатан » гэһэн шүлэг сооһоо хэһэг:
Шэжэр мүнгэн дэнзэтэй, Шэршүү торгон дэгэлтэн, Шэрэм булад тахатай Шэрхи, шуран хүлэгтэн. Чингисэй үри һаданар Шэнхинээ номо һуршатан... Улаан залаа малгайтай, Ута гүрэлөө гэзэгэтэн. Урда сагһаа һургаалтай Урагшаа тэгүүлдэг моритон. Найман зүгөөр алдартай « Нюуса тобшын » изагууртан... Бүхы дэлхэйдэ найрамдаха Буряад-монгол угсаатан.
Үнэхөөрөөл буряад- монгол угсаатан улад Чингисэй үри һаданар хадаа бүхы дэлхэйдэ мэдээжэ хурса мэргэн бодолтой улад гээшэ бэзэбди гэжэ буряад арад эрдэм бэлигээрээ бүгэдэ арадуудай дунда түрүү зэргэдэ ябалсадагбди гэжэ найдал, омогорхол түрүүлдэг.
« ЭРДЭНИ ЗЭНДЭМЭНИ ТҮРЭЛ ХЭЛЭМНАЙ »
Эхын уурагтал тэнхээхэ шадалтай, Эсэгын һургаалдал эблэрүүлхэ шэдитэй, Эртын сагһаа эхин түүхэтэй, Эрдэни зэндэмэни буряад хэлэмнай.
Эртэ урда сагһаа буряад арад түрэл хэлэн дээрээ харилсахаһаа гадна, эрдэм бэлигэй дээжэдэ хүртэжэ, ургаһан, хүгжэһэн арад гээшэ бэзэ. Сагай эрхээр буряад арад түрэл хэлэеэ һайнаар мэдэхэеэ болиһомнай харамтай, гэмшэлтэй. Гүрэн түрын арга туһаламжаар энэ бэрхэшээлһээ гараха саг ерэхэ гэжэ бүгэдэ арад найданабди. Эхын уурагтал үнжэгэн зөөлэн түрэл хэлэмнай хэзээшье хосорхо ёһогүй. Сагай эрьесэ һайн тээшээ хубилжа, Бурханай ном судар түгэд хэлэнһээ буряад хэлэндэ оршуулагдажа, олон түмэн арадта ойлгуулха асари ехэ ажал ябуулагдажа эхилһэндэнь баясанабди. Тиимэһээ түрэл хэлэнэймнай хүгжэхэнь дамжаггүй.
201