VOORSITTERSVERSLAG
VIR DIE SENWESBEL GROEP
GEAGTE AANDEELHOUERS EN ANDER
BELANGHEBBENDES
“Daar is tye van gevaar en onsekerheid, maar dit is ook die
mees kreatiewe van alle tye in die geskiedenis van die mens”
- Robert F. Kennedy 1966.
Gedurende die afgelope finansiële jaar van onsekerheid
op beide makro-ekonomiese en politieke vlak en een van
die ergste droogtes tot op datum in die Senwes gebied,
het die bestuur van Senwes weer hul kreatiwiteit, fokus en
deursettingsvermoë bewys. Die prestasie van die Senwes
groep gedurende die afgelope moeilike finansiële jaar,
spreek van hierdie eienskappe.
Senwes volg ‘n dividendbeleid waarvolgens gepoog
word om dividende te handhaaf gedurende ‘n dalende
siklus. Senwes kon, ten spyte van ‘n groot verskeidenheid
uitdagings, steeds daarin slaag om ‘n dividend van 40 sent
per aandeel (voor belasting) gedurende die finansiële jaar
te betaal. Dit het Senwesbel in staat gestel om ‘n totale
dividend van 27 sent per aandeel (voor belasting) uit te keer
en te betaal, wat ‘n dividendopbrengs van 4,5% tot gevolg
gehad het. Die opbrengs in die vorige finansiële jaar was
4,6%.
Die Senwesbel direksie is tevrede met die voortgesette belegging in Senwes. Senwesbel het gedurende die finansiële
jaar die belang in Senwes verder verhoog. 1 689 548 Senwes aandele is gedurende die jaar verkry wat Senwesbel
se totale belang in Senwes tot 52,91% verhoog het. Die gemiddelde aankoopprys van R10,55 per aandeel was laer
as die netto batewaarde.
Die beperking in Senwesbel se Akte van Oprigting, wat primêr die aandeelhouding in Senwesbel beperk tot
bona fide-boere, beperk die verhandeling van Senwesbel aandele en het gevolglik ‘n invloed op die aandeelprys.
Senwesbel se direksie oorweeg gereeld of die beheerstruktuur gehandhaaf moet word.
‘n Verandering in regulatoriese vereistes het veroorsaak dat die verhandelingsplatform vir Senwesbel aandele
gewysig moes word en Senwesbel het gevolglik gedurende Februarie 2017 op ZAR X genoteer.
5
SENWESBEL VERKORTE JAARVERSLAG 2017
Senwesbel Beperk Reg nr: 1996/017629/06