ALGEMEEN
RUBRIEK
Redaksiebrief
Uit die Woord
Is jy ’n span- of ’n
individuele speler?
M
et die uitgaan van 2019 en 2020 se intrap sien ons,
soos in vorige seisoene, ’n duidelike verandering
in die weerpatrone. Die reënseisoen het geskuif
en planne moet gemaak word om dit proaktief in
elkeen se strategie in te werk.
Met baie dele van die Noord- en Oos-Kaap wat steeds erg
onder die droogte gebuk gaan, vier samewerking hoogty om te
verseker dat ons medeprodusente oorleef.
Die vraag is nou: Is jy ’n span- of individuele speler? Meeste
mense veronderstel dat hulle een van die twee is. Ons Senwes
HUB, Francois Strydom, meen egter dat die teenoorgestelde
waar is en dat jy oor albei kwaliteite moet beskik. Die volgorde
is egter belangrik.
Party mense is in die posisie om droogtehulporganisasies te
help, terwyl ander nie betrokke raak nie. ’n Mens bepaal self in
watter mate jy begrip gaan hȇ en of jy eienaarskap gaan neem
en dit kan jou die ruimte gee om beide kwaliteite uit te leef. Dit
hang net van die situasie af. Soms is jy bo en ander kere moet
jy hulp van ander aanvaar. Soms is jy die individuele speler wat
moet oorleef in die droogte en geen keuse het nie as om jou
trots in jou sak te steek en te sluk as medeprodusente jou help
met skenkings.
Een ding wat die lewe ons leer is dat tye en seisoene vinnig
verander. Eendag is jy weer bo, wat dan weer jou spanvermoë
sal beproef. Die lewe gaan volsirkel, soms is jy in die individuele
fase waar jy veg om te oorleef en ander kere
is jy ‘n spanspeler wat sorg dat alles en
almal om jou oorleef.
Onthou altyd! Jy is ‘n produsent en ‘n
integrale deel van voedselsekuriteit
van ons land en die wêreld. Ons
moet die siklusse oorleef om weer te
kan floreer.
Johan Schoeman
My naam is Legio,
want ons is baie….
MARKUS 5 VERTEL die verhaal van ’n duiwelbesetene se ontmoe
ting met Jesus. ’n Uitgewekene wie se blyplek tussen die grafte
was. Hy was onbeheerbaar wild, het selfs die kettings en boeie
waarmee hy vasgemaak was om hom in bedwang te hou, gebreek
en dag en nag geloop en skreeu. Tot op dié dag toe sy pad met
Jesus gekruis het.
Toe hy Jesus sien het hy Hom tegemoet gehardloop, voor Hom
neergeval en Hom aangespreek as: “Jesus, Seun van God die
Allerhoogste”. Daarop spreek Jesus die bose gees aan en vra sy
naam, waarop hy antwoord: “Legio, want ons is baie.” Jesus het toe
die bose gees beveel om uit die man te gaan en dit in ’n trop van
sowat 2 000 varke ingestuur. Die varke het toe by die berg in die
see in afgespring en versuip. Dit het die boere so ontstel dat hulle
daarop aangedring het dat Jesus hul gebied moet verlaat.
Legio, want ons is baie! Soms voel dit vir ons of ‘Legio’ standaard
deel is van die pakket wat saam met die lewe kom, veral u wat in
die boerderybedryf staan. Die aanslae wat u as boer beleef het
legio gesigte, wat wissel van uitdagende natuurelemente, onseker
ekonomiese en politieke toestande, bedreigde veiligheid en stabi-
liteit en vele ander. Voeg daarby ’n wye verkeidenheid persoonlike
uitdagings wat u ook daagliks moet trotseer - inderdaad legio!
Ons veg elkeen ons eie Legio. Ons enigste uitweg is om ook
soos die besete man na Jesus te gaan. Hom as’t ware daagliks
tegemoet te hardloop en in afhanklikheid voor Hom as die Seun
van die Allerhoogste God neer te val, sodat Hy vir ons die geveg
kan veg, soos ons hier en in Eksodus 14:13 lees. “Bly julle maar
kalm. Die Here sal vir julle veg.”
Dit is wonderlik dat, nadat Jesus die bose gees uit hierdie eens
ontembare besetene se lewe gedryf en hy vrede in God gevind het,
hy ’n lewende getuie van God se triomferende mag oor die bose
word.
Mag u naby Jesus leef, mag u tydens u konfrontasie met Legio
hulle soos die besetene in Jesus se hande laat, deur Jesus oorwin-
ning oor hulle kry en vrede in God vind.
Ons bid: Here, versterk ons geloof in U, ons almagtige God vir wie
niks onmoontlik is nie. Amen.
2
SENWES SCENARIO | HERFS • AUTUMN 2020