•••
RUBRVI
KOS
I ER
K D I E SI E L
DS. WILLIE BOTHA
Aan die voete
van Jesus
LEES MARKUS 5:1-20
VOOR JESUS SE VOETE HET VERSKEIE
AANGRYPENDE TONELE AFGESPEEL. MENSE
WAT SIEK WAS SOOS DIE MELAATSE IN MARKUS
1. LATER KOM ‘N ANDER MELAATSE OP SY KNIEË
VOOR JESUS DANKIE-SÊ VIR SY GENESING. JAÏRUS
KOM PLEIT VIR SY DOGTERTJIE SE LEWE VOOR
JESUS. MARKUS 10 VERHAAL VAN ‘N MAN WAT
VOOR JESUS NEERGEVAL HET EN WOU HOOR WAT
HY MOET DOEN OM DIE EWIGE LEWE TE BEËRWE.
OOK PETRUS VAL VOOR JESUS NEER EN BELY DAT
HY ‘N SONDIGE MAN IS.
E
en van die roerendste
verhale is egter dié van
die besetene van Gerasa.
Sodra Jesus en sy dissipels
voet aan wal sit, kom ‘n man
met ‘n onrein gees na Jesus
aangehardloop. Sy reputasie
word treffend beskryf: Hy
was buitengewoon sterk
en het selfs kettingboeie
gebreek. Verder het hy dag
en nag tussen die grafte
geskreeu. Hy het homself
met klippe stukkend gekap.
Volgens antieke Joodse
geskrifte het hy aan al die
kriteria voldoen om as ‘n
besetene beskou te word.
Nodeloos om te sê, het sy
gedrag vrees en bewing in die
omgewing veroorsaak. Maar
dan gebeur die onverwagte:
52
Waar ander mense van hom
af weghardloop, kom hy
na Jesus gehardloop. Jesus
hardloop nie weg nie. Sy
vraag aan Jesus is ironies:
“Wat het U met my te
doen, Jesus, Seun van God,
die Allerhoogste?” Dit is
interessant dat Hy Jesus se
titel so volledig beskryf. Net
asof hy nie anders kan as
om Jesus te bely vir wie Hy
werklik is nie. Jesus wys egter
vir hom dat Hy alles met
hom te doen het. Hy maak
hom gesond. Die mense van
die omgewing was verbaas
en het groot geskrik toe
hulle hom by die voete van
Jesus, by sy volle verstand
en gekleë, sien sit. Jesus laat
hom nie toe om saam met
June/July 2015 • SENWES Scenario
Hom te gaan nie. Hieroor
is daar al baie bespiegel.
Dalk het Jesus net besef dat
hy eers sy verhoudinge in
sy omgewing moet herstel.
Dit sou vir hom ‘n veilige
hawe wees. Die mense sou
die geleentheid kry om hom
weer in hulle gemeenskap op
te neem.
Kort voor hierdie
wonderwerk het Jesus die
storm op die see van Galilea
stilgemaak. Net hierna het
Jesus Jaïrus se dogtertjie uit
die dood opgewek. Jesus
wys sy heerskappy oor die
natuurkragte, bose magte
en die dood. Maak nie saak
wat ons situasie is nie, ons
word ook uitgenooi om
voor die voete van Jesus
heel te word. Maak nie
saak hoe groot ons sonde,
siekte of bekommernis is
nie. Aan die kruis bewys
Hy dat Hy alles met jóú
en mý te doen wil hê.
• Aangrypende tonele
het voor Jesus se
voete afgespeel
• Jesus hardloop nie
weg van mense met
groot probleme nie
• Geen krisis is vir
Jesus te groot nie
• Jesus het alles met
ons almal te doen –
Hy wys en bewys dit
aan die kruis