JAG | HUNTING
JAGTYD!
Terwyl die somer se plesiertjies einde se kant toe staan, begin jagters se gedagtes te
dwaal. Die onbekende van 'n jagseisoen wat voorlê, kan ’n jagter se gedagtes dae aaneen
besig hou. Graag wil hulle voortbou op vorige jare se sukses, sonder om weer in dieselfde
gat te trap van vorige jare se foute.
Deur Jan-Lodewyk Serfontein
Jagkenner
S
aterdagoggend is dit juis een van
die beplande jagdae met 'n be
plande bok op die wenslys. Die
kinders is vroeg op en wakker,
aangetrek, ingepak en gereed vir die dag.
My dogter se eerste jag, wat maande lank
beplan is, het aangebreek. Van inskiet op
die baan tot skootplasings is bespreek en
ingeoefen. Om die bok op die regte plek te
tref op verskillende afstande, weet sy meer
van as meeste ander jagters. Nou kan die
dag verloop soos beplan.
Maar wat doen ons as alles nie reg
verloop nie? Sal sy weet hoeveel om te
kompenseer as die bokke nie gaan staan
waar hulle moet staan nie? Wat as die
wind te veel waai? Sal sy oor die bokkoors
kom, wat sekerlik gaan opduik nes die
perfekte skoot homself voordoen? En dan
moet sy net nie die bok kwes nie. Jou
eerste bok moet 'n ervaring wees wat jy
vir altyd wil onthou en vir altyd kan oorver-
tel. Dit moet perfek wees.
Gelukkig het die bok na ’n bietjie se
rondloop presies plankdwars gaan staan.
Nader aan 100m kon die bok nie gaan
staan het nie. Nou kan die prentjie perfek
ingekleur word, indien sy alles doen soos
sy geoefen het.
Die kruishaar het agter die bok se
blad sy lêplek gaan soek. Die sneller druk
was net soos wat sy geoefen het. En nog
voor die skoot se klap insink, het die bok
tussen die gras platgeval. Haar gesig kon
stories vertel, woorde was daar nie, en
haar asemhaling was meer opgewonde
as nog ooit tevore! Vandag het alles pre-
sies reg verloop sodat sy 'n perfekte dag
kon hê. ’n Perfekte dag soos wat 'n trotse
pa wil hê dit moet wees.
Nadat die bok afgeslag is en die vleis
in die koelkamer is, kan daar ontspan
word. Stories kan vertel word en die dag
kan oor en oor herleef word. Tussen deur
al die nuwe stories, emosies en opge-
wondenheid, kry ek die geleentheid om
vir haar te vra hoe haar dag was en of sy
weer ’n bok sal skiet. Behalwe ’n spon-
tane antwoord van “natuurlik”, was daar
nie veel meer oor die skiet gesels nie.
Om in die veld te wees, te swem in die
plaasdam en net kind te wees het haar
dag gemaak!
Later sit en herkou ek aan die lesse
wat kinders ons leer. Vandag het die
kinders my weer nuwe lesse geleer. Ons
beplan maande lank aan 'n jagtog. Wat
ons wil jag, waar dit gaan wees, hoe die
bok moet staan en hoe ver hy moet staan.
Ons beplan namens die natuur hoe ons
wil jag, hoe ons die natuur wil ervaar.
Vandag het my dogter my geleer dat
ek jag moet geniet vir wat dit is en nie wat
ons wil hê dit moet wees nie. Om in die
natuur te wees, dit te ervaar en naby aan
God se skepping te wees. Te staar in die
vuur se vlamme, die naggeluide te geniet.
Die onbekende te soek en geleenthede
wat hulself net soms voordoen, te ervaar
vir wat dit is.
Geniet julle jagtyd!
SENWES SCENARIO | KOPSKUIF 2019
29