ALGEMEEN | GENERAL
COLUMN | RUBRIEK
Uit die Woord
Laat jou woorde prut
in ’n geurige sous
D
ie huidige landbouseisoen is baie laat, sowat agt weke
om presies te wees, het ek weer gehoor na my onlangse
gesprek met Senwes HUB, Francois Strydom rakende die
finansiële resultate. Dit het natuurlik verreikende gevolge,
waaroor hy in sy artikel uitwei.
Maar waar begin mens om ’n LAAT seisoen te definieer en die impak
daarvan te omskryf? Daar is so baie idiome en gesegdes oor laat.
Hoe later hoe kwater... noem hulle maar op. Selfs die trappe van
vergelyking, laat, later laatste… laat jou sommer sidder en bewe van
vrees as iemand jou met die woorde agterlaat. Laat is so kripties en
verduidelikend dat dit op sigself jou klaar penregop laat staan, reg
om met jou rug teen die muur op die verdediging te gaan.
So ook in sulke kwesbare tye soos hierdie, laat ons ander soms
met net ons woorde wat ons uiter, wat natuurlik ’n geweldige impak
kan hê. Daarom moet ons poog om ons woorde eerder in geurige
souse te doop. Dit net sodat die ontvangers daarvan soveel meer
ontvanklik daarvoor kan wees. En selfs al is die ontvangers aanvan-
klik heeltemal onontvanklik daarvoor, sal hul mettertyd, miskien ’n
volgende keer, dit beter inneem en verteer.
Maar die ander end van die skaal is ook beslis waar, om feitelik kor-
rek te wees, om die ware impak van die situasie weer te gee, maar
met ’n positiewe nadraai. Dat ons sal moet laat wiel, die laatlamme
tjies hanteer en nie toelaat dat die laat seisoen ons onderkry nie. ’n
Boer maak mos ‘n plan en in ruil word ons durf en daad in ons DNS
vervat, reg vir toekomstige generasies om te benut.
Ek laat julle met die woorde van Tony A Gaskins
Junior: “’n Fout word ’n les, pyn word ’n
doel, ’n gemors word ’n boodskap, ’n toets
word ’n getuigskrif, elke struikelblok word
’n geleentheid, maak nie saak hoe sleg
die geleentheid is nie - neem die les.”
Boer gefokus voort, produsente!
’n Mosterdsaadjie
Lees: Matt. 13:31,32
Ds. Willie Botha
Mosterdsaad was van groot betekenis in die Bybelse tyd.
Net deur die woord mosterdsaad te gebruik, het Jesus dade-
lik die aandag van al die mense gehad, veral dié van die
Fariseërs. Mosterdsaad is geweldig klein, trouens dit word
in die Joodse wette en selfs in die Bybel gebruik as maat-
staf van besondere kleinheid. Dink maar aan Matt. 17:20,
waar Jesus noem dat ‘n mens maar net soveel geloof as ’n
mosterdsaadjie moet hê en dan berge kan versit. Dit was
egter ook onrein. Daar was streng wette oor waar sekere
sade geplant en nie geplant mag word nie. Mosterdsaad het
verskriklik vinnig ontkiem. Party mense sê dat dit ontkiem
sodra dit op die grond val. Wanneer mosterdsaad byvoor-
beeld tussen koring geplant sou word, kon ’n mens maklik die
koring en die mosterdplant verwar. Levitikus 19:19 verbied
die saamplant van mosterd met ander plante omdat dit die
skeppingsorde sou versteur. Die vermenging sou neerkom
op ’n skending van die heiligheid van God. Daarom moes
mosterdsaad eenkant geplant word, nie tussen die koring nie,
en ook glad nie in ’n tuin nie. Uit ’n botaniese oogpunt is die
mosterdplant ook nie as ’n boom gekategoriseer nie, maar
eerder as ’n struik. Die plant het slegs sowat 120 cm groot
geword en baie gebruike gehad. Dit het ’n besondere smaak
aan kos gegee, maar eintlik is dit veral die medisinale gebrui-
ke wat ’n mens opval: dit is gebruik vir teengif vir slang- en
skerpioenbyte, teengif vir gevaarlike swamme, maagproble
me is daarmee gedokter, dit het gehelp vir tandpyn, vir slym
op die bors en vroue het dit ook graag gebruik.
Ons vind ’n teenstrydigheid in die grootte van die mosterd
plant. Die mosterdsaadjie raak so groot dat voëls in die takke
kan nesmaak. Nou hoe kan voëls in die takke van ’n plant
nesmaak wat maar net oor ’n meter is? Hulle sal mos deur
katte en allerhande ander diere gevang word? Luister
gerus: Die groot seders van die Ou Testament wat met
aardse koninkryke soos Egipte en Babilonië vergelyk word,
het almal tot ’n val gekom. Aardse koninkryke en dit wat ons
as groot op aarde beskou, het eenmaal nie ewigheidswaarde
nie. ’n Mosterdsaadjie raak die soort plant wat die eienskappe
van ’n seder dra. Die koninkryk van God begin byna onsien-
baar klein, maar dit raak daardie verskriklike groot boom,
wat dit eintlik, menslik gesproke, nie kan word nie. Jesus se
koninkryk is dus anders as die koninkryke van mense.
Jesus se koninkryk groei, versprei en genees soos mosterd-
saad. Dit oortref ons wildste verwagtinge. Dit is onvernietig-
baar en ewig. God wil hê dat ons in hierdie huis van Hom
sal tuis wees soos die voëls van die hemel.
02
SENWES SCENARIO | LENTE • SPRING 2019