ma PUzuguletuaiñ: “Tati küzaw ayinielu ñi
entual weke kim mapuzuguyelu”
Gen wirin: Karina Palma Trujillo
rulpanzugu: Alberto Huenchumilla Marilao
Pütxüken küzawgeyechi zugu mew petu
entugeyelu tañi witxañpüramgetuafel ta
mapuzugun, kiñe txokiñ wecheke che
txawülüwigün tañi entuamegün kursu
ka koneltun mapuzuzugun pu wecheke-
che mew ka alüketxemke che mew ñi
kimeltual ta mapuzugun.
¡Mari mari peñi! ¡Mari mari lamgen!
Femgechi chalinkepiwigün kom ti pu
konpulu fey chi pu kimeltuche ñi ruka
mew, Temuco mülelu, chew ñi kimel-
falgen ta Mapuzuguletuaiñ, feytachi
küzaw ayiniey ñi witxañpüramtual ta
mapuzugun kimeltun zugu mew.
Alün che mew fillke txemke che
mew ñi puwün mew, femi ñi zoy zoy
falintun-niegetun mew ta mapuzugun,
feychi wiño piwkeyegetun mew ka ma-
puche txokiwtun mew ta mapuzugun ñi
zuam, chaf pu wechekeche mugel mew,
feyegün ñi rakizuamkülen egün ñi
mülenole ti mapuzugun feyta amulewe-
layay ta mapucheke che, feyti nación
mugel ta chumkawrume mülelayafuy.
Feytachi zugu mew ta txükoluwi-
gün ta Mapuzuguletuaiñ mew, feytachi
txokiñche mew konküley mapuche ka
mapuchegeyenochi che,
ka kim mapuzuguyelu ka petu kim mapuzu-
gumekelu, welu zew fentepun kimüwyeigün
femechimu ñi pepi kimeltuwyenegün ta ka
mapuzugun.
We zugunu ta feyta, kuifitugewyetuy ñi
llitugen tüfachi zugu, pu wechekeche mew ñi
enturumeluegün ta kiñeke kursu, ti kiñeke
kimeltuwe ruka mew, ka fey ñi wünemuegün
ñi entuken ti koneltun mapuzugun, feychi
fewreru küyen mew, 2015 txipantugelu.
Feytachi pu che müten kuifimew ta txür
witxañpüramkelu ta mapuzugun, epuchipan-
tu yenieluegün, ka kizu pepiluwün mew ta
witxañpüramfigün ta Mapuzuguletuaiñ, fey
tañi nietuamegün weke kim mapuzuguyelu,
fey mew ta entumekelu egün ta kursu ka ko-
neltun mapuzugun, fillke amun nielu. Ka fey
konküleigün ti pu txokiñche newenmakelu ta
mapuzugun txekañpen mew ñi ofisializageam,
fey ñi entugeken fillke txipantu feychi ñuke
zugun ñi antü mew.
“Müley ñi witxañpüramtual ta mapuzugun
piyiñ”
Paula Wenumilla, konkülelu ti txokiñche mew,
feypi ñi mülen fillke zugu ñi entual ta Mapu-
zuguletuaiñ fey ñi tukupual mapuzugun ta ka
itxofill wallmapu püle. “iñchiñ ta mapuzugun
mugel ta falintuniefiyiñ, pu mapuche ñi azmo-
gen mew ta nielu, ka fey-
tüfachi mapu mew ñi müleken tati”.
Ti ñizolkülelu ti Mapuzuguletuaiñ mew, Serkio
Marinaw, ayiwmafigün tüfachi küzaw ñi chumlen
mew ta mapuzugun mew, feymew mügel, “müley
taiñ witxañpüramtual taiñ mapuzugun, taiñ petu
ñamnarkületun ta mapuzugun mew”.
“Felefuy ñi püchike nien müten ta kimün
feypiyiñ: “kimelaiñ ta mapuzugun”. Rakizuamiyiñ
ñi genoafeluwün mew ta pepiluwal, fey ta ño-
chikechi zoy zoy küme kimürpuiñ ñi kimal chem
zugu ñi entual ka chew püle ñi küzawal. Fantepu
ta mapuzuguletuiañ rume ayiniey ñi witxañpüra-
mtual ta mapuzugun ka kimeltuafiel epu zugun
rüke”, feypi.
Ñi chumten che mew ñi konken ti küzaw
mew, Marinaw ta feypi: “kimtukunieliyiñ ta tüfa-
chi küzaw ñi kake txokiñche mew ñi entukeyefiel,
feypiafuiñ ta rupakey zoy kayu pataka che ti ko-
neltun mapuzugun mew. Iñchiñ mew müten taiñ
koneltun mew ta zew rupawyey epe epu pataka
kechu mari che”.
Ka feypi ta ka, alüken chillkatufe konke-
lu taiñ küzaw mew münake kimuwyeigün ta
mapuzugun. “Entukeiñ ta fillke kursu chew ñi
rumtukuwken ta mapuzugun mew ta iñchiñ, fe-
yta zewmagekelu ta re mapuzugun mew. Feymew
ta kimeltukeiñ ka gütxamkakeiñ ta re mapuzugun
mew.
Iñchiñ feypilefuiñ taiñ pu chilkatufe zew
weke kim mapuzuyelugeigün tüfachi pu che”.
Ka fey, Pedro Mariman, wünenkülelu ti
CNCA mew, Arawkania kiñel mapu mew, fe-
ytachi txokiñche rüftu kimelkeigün ka chillka-
tukeigün ta mapuzugun, pi. Ka fey tati ofisia-
lizasion zugu ñi rume küzawtuken ñi txipayal,
feyta ñi femechi ñi rumel amuleken ti politiku
zugu tüfamew”.
“Püchi llikaleluegün txokiniefiñ , ñi ra-
kizuamün mew, ñi kiñe fütxa zugu mew ta
konalu tati estaw txokifigün, ti ofisialgele ti
mapuzugun txokiwküleigün. Feyta re ma-
puzugun mew zugulealu ta che. Welu kafey
ñochikechi ta famchipameketuy feychike raki-
zuam, feychike llükan, fey tañi falintutunmue-
gün ti fillke zugun ñi müleal”, ka feypi.
Mapuzuguletuaiñ, feyta wigka zugun mew
ta feypiley “volveremos a hablar mapuzugun”,
ka konküleigün Mesa Ofisialización Mapuzu-
gun pigelu mew, chew ñi rüpütulgeal ka azku-
nugeal ti kiñe el witxañpüramtun mapuzugun
mew: “Wallmapu ñi zugun” .
Tami küme kimal ti kursu ka koneltun
ñi entugekeyel zoy kimaimi tati Mapuzugule-
tuaiñ ñi Facebook ka Twitter mew.
Wele püle ta man püle mew: Alina Namünkura, María Katxilew, Paula Wenumilla, Sergio Marinaw, Armando Nawelpan,
Rosendo Wiska.