Fin de curso! Fin da Primaria! Adeus, Lamas!
Este ano estamos de despedida pero queremos que sexa unha despedida alegre e divertida.
Moitos de nós estamos no centro dende os 3 anos e imos levar para o instituto moi bos recordos
de todo o profesorado e compañeiros e compañeiras.
Algúns aínda nos lembramos do primeiro día de clase, onde todos tiñamos medo e do enorme que nos pareceu o colexio e a porta… tan GRANDE!! Recordamos como era o colexio e como mellorou e o ben que o pasamos aquí, sobre todo nos recreos: xogar polo monte enorme que temos; nas pistas, ao baloncesto, cos amigos de sempre … O colexio acábase. Aquí aprendemos a escribir, a ler a contar. Lembrámonos das risas na clase, dos nervios ante os exames, das celebracións do Samaín e o Magosto, do Entroido, dos Maios, das lecturas colectivas no patio, das aulas de infantil con todos os xoguetes, das horas de estudo, dos deberes… moitos deberes!
Estes últimos anos estivemos traballando e estudando moito, pero tamén gozamos nas excursións, que foron moi divertidas, sobre todo as do día enteiro: Marcelle, os museos da Coruña, a do ano pasado a Silleda e, este ano, Galipark … Seguro que o pasamos xenial. E por suposto un recordo moi especial para a biblioteca e Abadiño. Grazas por mostrarnos todos eses libros tan interesantes!
Ademais, moitos participamos nas actividades extraescolares e no comedor con recordos inesquecibles.
Aprendemos cousas moi diversas sobre a nosa cultura, as nosas tradicións e historia pero
sobre todo aprendemos a ser mellores persoas e cidadáns, a respectarnos valorando a nosa diversidade a relacionarnos,
a compartir, a dicir non, a traballar en equipo, a axudar aos demais e a ter unha actitude positiva,
crítica e construtiva ante a vida. Mellor imposible!!!
O colexio acábase. Foi xenial pero hai que seguir crecendo. Aínda que os nosos camiños se separan e imos ir a distintos institutos,
estamos seguros de que sempre recordaremos con cariño que estudamos no CEIP Lamas de Abade.
Nesta nova etapa seguro que imos aproveitar todo o que aprendemos aquí.Viremos de visita a contarvos como nos vai.
Un forte abrazo para todos e todas os que formamos parte deste centro.
Adeus, CEIP Lamas de Abade!