Mi primera publicacion Catálogo de Pensar coas mans | Page 13

A ARTESANÍA, ENTRE O ÚTIL E O FERMOSO
«Pensar coas mans» é un percorrido histórico pola cestería, a cerámica
e a xoiería en Galicia, actividades fondamente arraigadas na nosa terra,
que nos permite chegar aos creadores actuais, que nos permite explorar
o significado da artesanía como un concepto que vai máis alá do traballo
manual. Nela vemos como o artesán deixa de ser o encargado de manufac-
turar obxectos utilitarios para converterse nun autor que deseña e elabora
as pezas proporcionándolle un valor engadido á súa función primeira.

Os artesáns hoxe en día chegan ao oficio xa non só por trans-
misión xeracional, senón por vocación propia e consciente, cunha sólida
formación en artes ou deseño á que van incorporando as técnicas e o
saber facer tradicional, do que se converten en portadores e salvagardas.
O artesán é un profesional poliédrico: autor, deseñador, mestre, referente
e investigador en materia de artesanía e, ao tempo, especialista en promo-
ción, vendas, márketing ou contabilidade.

A artesanía é un sector económico en auxe ligado aos materiais
nobres, á intervención manual pero non limitada por ela, á ecoloxía e á sus-
tentabilidade, ao desenvolvemento local e á volta da poboación ao rural,
á súa estruturación e dinamización empresarial. A colectividade doutros
tempos deulle paso á reivindicación das marcas individuais de cada autor,
ao tempo que vemos como aparece a idea dunha nova colectividade que
respecta estas autorías grazas á marca Artesanía de Galicia. Un distintivo
ligado tamén a un espazo xeográfico, a un patrimonio e a unha cultura,
garantía da calidade dos produtos e plataforma de promoción do sector
artesán galego no seu conxunto, que nos está permitindo introducir as
nosas pezas artesás en mercados de todo o mundo, chegando ata países
como O Xapón ou Australia.

A nosa artesanía é un sector heteroxéneo en canto aos diferentes
perfís dos profesionais que o conforman, especializados nun grande abano
de actividades artesanais, pero que non traballan só de cara ao seu propio
taller senón que cada vez máis interaccionan con outros ámbitos, enrique-
cendo un conxunto no que a maioría dos profesionais ocupa un espazo
intermedio entre o utilitario e o artístico.

Dicía Octavio Paz que as artesanías pertencen a un mundo
anterior á separación entre o útil e o fermoso. A beleza e a funcionalidade
da nosa artesanía teñen que seguir indo da man para conservar e poñer
en valor este importante patrimonio, tal e como se pon de manifesto nesta
exposición.

Francisco Conde López
Conselleiro de Economía, Emprego e Industria