Magasin Magasini | Page 32
Meeqqat imigassartaqanngitsumik nuannisartarput
Atuagassiami uani meeqqat imigassartunngikkaluarlutik allanik aanngajaarniutinik pinngikkaluarlutik nuannisartartut
naapippagut. Taakkua kammalaatitik, ilaquttatik ilagalugit nuannisartarput. Timersorlutik, ilaqutariinni
katerisimaarnerni, sunngiffimmilu orniguttarfimmut Inneruulamiinerminni nuannisartarput.
All. Nina-Vivi Andersen
USK-imi 7. Klassit amerlanertigut Inneruulanut tallimanngornermi
qitigiarneq aallutaraat. Inneruulat sunngiffimmi atuartunut minnernut
inuusuttuaqqanullu orniguttarfiuvoq. Ullukkut atuartunut minnernut
paaqqinnittarfiulluni. Unnukkut inuusuttuaqqat 11-iniit 21-inik ukiullit
nalunaaqqutaq 23.00 tungaanut sunngiffimminni Inneruulaniisinnaallutik.
Qaqugukkut illit nuannisartarpit?
Aviaaja Boassen, 12-nik ukiulik.
Tallimanngornermi Inneruulanut qitigiartarpugut. Kammalaatikka
naapittarpakka issiaqatigalugit qiteqatigisarlugillu. Ilaannikkut aneertapugut.
Nuannertaqaaq. Nuannisarnerpaasarpunga aneertilluta illaqattaarluta.
Tallimanngornermi nuannisartaqaanga.
Pipaluk Johansen, 12-inik ukiulik.
Tallimanngornermi Inneruulanukartarpugut nuannisariarluta. Inneruulani
kammalaatigut naapittarpagut nuannisaqatigisarlugut, illaqatigiilluta
ilageerujoortarpugut. Inneruulat taamaattumik nuannertaqaaq.
Nipilersortoqartarami, qitittoqartarlunilu. Uagut qitinneq ajorpugut,
qitittarfimmi kaavittarpugut pisorujoorluta.
Karl-Peter Muse Larsen, 13-inik ukiulik.
Upernavimmi qeqartoqaraangat nuannisartaqaanga. Qeqartoqartillugu
ilaqutariilluta festertarpugut. Qitittarpugut, erinarsortoqartarpoq,
pinnguaatinik eqquiniaatitsilluta, nipilersuuteqartarlunilu. Qeqartoqartillugu
suut tamaasa nuannersisarput, nuannertorujussuanngorlutik.
32