| Uitvlucht
Op 13 Mei begin Uitvlucht landwyd in teaters draai. Die hoofrol word vertolk deur
Clara Joubert van den Bergh, met haar man, die welbekende rolprentmaker
Regardt van den Bergh, as regisseur.
Clara Joubert het vir haar man, Regardt van den Bergh, vertel van
die plaasskooltjie in die Oos-Kaap waar sy skoolgehou het. Sy het
die stories begin neerskryf, en kort voor lank was daar ’n draaiboek.
“Ons het my ervarings en van die staaltjies by die skool en hoe
ons mekaar ontmoet en verlief geraak het, bymekaar gesit – met
natuurlik ’n bietjie fiksie en drama daarby, en so is Uitvlucht gebore.
Toe Regardt hoor die skool waar ek skoolgehou het se naam is
Uitvlucht, was sy eerste woorde: ‘Dit gaan ’n fliek word.’ So maklik
soos dit.”
Clara en Regardt, wat in 2012 getroud is, het saam die draai
boek geskryf. “Baie dae, weke en maande van dink, praat, skryf
en oorskryf,” sê sy.
Uitvlucht vertel die verhaal van Anna, ’n vrou wat alles verloor
ná ’n buite-egtelike verhouding. Sy kry werk by ’n plaasskooltjie en
begin stadig maar seker haarself vergewe. Met die ondersteuning
van die ander onderwysers by die skool en die vriendskap van ’n
saggeaarde boer van die omgewing kan Anna weer die lewe in
die oë kyk.
Ook in die rolverdeling is Stian Bam, Margot Luyt, Carel
Trichardt, Jill Levenburg, Oscar Petersen en Clyde Berning.
“Ek en Stian het mekaar glad nie voor die tyd geken nie en ek was
maar skrikkerig vir hom,” sê Clara. “Hy is ’n baie ernstige akteur
en ek dink in ’n mate inkennig, soos ek ook maar is. Maar vir ons
karakters het hierdie inkennigheid soos ’n handskoen gepas. Nie
Dok (Bam se karakter) óf Anna wou regtig weer iemand in hulle
lewe hê nie. Uiteindelik het ek baie lekker saam met hom gewerk,
en dit was vir my ’n voorreg. Stian is behulpsaam, talentvol en gaaf.
Ja, Stian is regtig nice!”
Ná die maak van Uitvlucht het sy nie stilgesit nie.
“Ek en Regardt het twee tekste aan kykNET voorgelê en hoop
om binnekort daaraan te begin werk. Ek het ook ’n draaiboek vir
’n Afrikaanse rolprent, Bon Voyage, Ouma Koos, klaar geskryf.
Dis ’n lekker storie met ’n ubuntu-gevoel. En dan is ek besig met
die sinopsis van nog ’n Afrikaanse komedie waaroor ek baie
opgewonde is.”
Wie sal van Uitvlucht hou?
“Mense wat hou van stories uit die hart, sonder pretensie –
eintlik enigiemand wat wag op ’n tweede, derde of selfs vierde kans
om liefde te vind. Die grootste boodskap in die fliek is dat die liefde
alles oorwin. Al is jou hart ook hoe verhard, aan die einde van die
dag soek jy net twee dinge: liefde en aanvaarding.”
Klik hier
vir die
lokprent
42
Clara Joubert van den Bergh en Stian Bam op die stel van Uitvlucht.
kykNET | UITGAWE 2 | 2016
Clara, ’n voormalige graad R-onder
wyseres, met van haar jong medespelers.