Ktieb Festa 2020, Każin Banda San Pawl Safi Ktieb 2020, Safi, Malta

Każin Banda San Pawl, Safi Festa 2020 Mill-Pinna tal-Editur Alexis Callus “Għalkemm il-marda f’ġismi kienet ta’ prova għalikom, intom ma stmerrejtunix u anqas stmellejtuni, iżda lqajtuni bħala anġlu ta’ Alla, bħal Ġesù Kristu… li kieku kien jista’ jkun, kontu taqilgħu għajnejkom u tagħtuhomli” (Gal 4:14-15). Dak illi jiġri madwarna jaffettwana lkoll. Din is-sena se nkunu qed niċċelebraw festa b’differenza, iżda din ma tnaqqas xejn mid-devozzjoni tagħna lejn San Pawl u t-tagħlim tiegħu. Il-pandemija internazzjonali biddlet bil-kbir in-norma tagħna, iżda fir-realtà hemm miljuni ta’ nies madwar iddinja li ta’ kuljum, u għal snin twal, kellhom jgħixu barra minn dak li huwa normali għalina kaġun ta’ faqar, ġuħ u gwerer. Mumenti bħal dawn għandhom isaħħuna u bihom nagħrfu l-importanza tal-ħajja li ngħixu u tas-solidarjetà. Min-naħa tagħna ridna naraw li kemm jista’ jkun ma nħallux l-effetti tal-pandemija jaffettwaw dawk l-affarijiet illi stajna nagħmlu. Mill-ewwel tkellimt mal-kumitat biex nikkonferma magħhom li l-intenzjoni tiegħi kienet dik li nagħti sehmi biex nara li din ilpubblikazzjoni tinħareġ u b’hekk ma naqtgħux barra tradizzjoni li hija mistennija wkoll f’dawn il-jiem ta’ festa. Dan il-ktieb huwa sors ta’ introjtu għas-Soċjetà u b’hekk ridt nara li din l-opportunità ma tintilifx. Grazzi kbira tmur lis-Sur Emanuel Zahra, lis-Sinjura Catherine Zahra u lis-Sur Manuel Debono li huma kruċjali filħidma sabiex jinġabru r-riklami li jingħaddu ma’ tant donazzjonijiet li għandu bżonn il-Każin. Il-pandemija waslet biex ċertu xogħol u attivitajiet soċjali jitħassru b’mod immedjat, iżda l-ispejjeż xorta baqgħu hemm, l-obbligi mal-kredituri jibqgħu u b’hekk il-Kumitat Ċentrali ħaqqu kull appoġġ f’din il-ħidma tant diffiċli. Nappellalkom tużaw is-servizzi ta’ dawk li qed jirriklamaw f’dan il-ktieb, żommu kopja ta’ din ilpubblikazzjoni fil-viċin, u meta tkunu qed tfittxu xi servizz ibdew minn hawn. Grazzi kbir lil dawk kollha li għal snin twal appoġġjaw lil din is-Soċjetà. Fil-publikazzjoni ta’ din is-sena rajna li nwasslulkom l-atmosfera li kien hawn matul il-festa tas-sena l-oħra; il-marċi, in-nar, il-kunċerti, l-armar u l-attivitajiet tas-sottokumitati. Issibu wkoll artikli interessanti b’rabta Pawlina kif ukoll artikli li jħarsu lejn l-antenati tagħna u l-kultura lokali. Artiklu prestiġjuż ieħor huwa dak marbut mal-arti Rinaxximentali Għoli u li jagħti ħarsa lejn l-artist ċelebri Raffaello fl-anniversarju tal-500 sena millmewt tiegħu. Grazzi kbrira lill-kontributuri kollha. Nirringrazzja wkoll lil dawk li għenu fil-pubblikazzjoni, il-bord editorjali kompost minni kif ukoll mis-Sur Paul Abdilla u s-Sur Carmel Callus li ħadu ħsieb il-qari talprovi kif ukoll lis-Sur Saviour Sammut li qara l-ktieb qabel il-pubblikazzjoni. F’ħin qasir irnexxielna ngħaqdu pubblikazzjoni oħra li tagħti ġieħ lis-Soċjetà tagħna u lil Missierna San Pawl. Grazzi lil dawk kollha li pprovdew ir-ritratti b’mod speċjali lis-Sur Carl Farrugia li ħa ħsieb jieħu ritratti taljiem tal-festa li għaddiet. “Min hu marid u m’iniex marid miegħu jien?” (2 Kor 11:29). San Pawl, f’din il-festa, qed ifittex mingħandna xi ħaġa differenti. Din għamel referenza eċċellenti għaliha Mons. Mario Grech fis-Solennità tan-Nawfraġju tal- Appostlu Missierna San Pawl fil-Knisja parrokkjali ta’ San Pawl Nawfragu, il-Munxar. “San Pawl qed jgħidilna li hu waqqaf il-Knisja b’azzjoni waħda imma li għandha tifsira profonda: biex ninqeda b’espressjoni tal-Papa Franġisku, Pawlu jista’ jgħid li fostna waqqaf - sptar fuq il-kamp tal-battalja - li fih isibu l-fejqan u l-faraġ dawk kollha li huma feruti. Din hija l-Knisja.” Mons Grech għalaq billi qal: “Knisja Pawlina hija Knisja li toffri t-tama lil kull min hu marid, speċjalment lil min hu marid gravi; Knisja li tagħraf lil Pawlu bħala missierha trid tkun Knisja li tilqa’ lil dawk li qatgħu qalbhom jew ħaddieħor qata’ qalbu minnhom!” Nawguralkom festa b’differenza; inħeġġiġkom tipparteċipaw fl-attivitajiet kollha, u fuq kollox nawguralkom ħafna saħħa. Nota Editorjali: Id-direttivi tal-awtoritajiet jistgħu jkunu tali li xi informazzjoni ppubblikata mhix korretta. Il-Kumitat jirringrazzja lil dawk it-tobba, infermiera u ħaddiema tad-Dipartiment tas-Saħħa u ħaddiema li jaħdmu fid-djar għall-anzjani u nies vulnerabbli Ħal Safin, kif ukoll lil dawk kollha li qed jaħdmu qatigħ fil-ġlieda kontra l-imxija tal-Covid-19 5

Ktieb Festa 2020, Każin Banda San Pawl Safi Ktieb 2020, Safi, Malta | Page 7