Ktieb Festa 2020, Każin Banda San Pawl Safi Ktieb 2020, Safi, Malta | Page 43

Każin Banda San Pawl, Safi Festa 2020
Bħal San Pawl għad
nerġgħu naraw id-dawl
Mro. Michael Bugelli A.T.C.L.
Ġejt mitlub nikteb il-messaġġ tiegħi
għall-festa ta’ Missierna San Pawl ta’
Ħal Safi, din is-sena f’ambjent totalment
differenti, ħafna differenti minn dak li
aħna mdorrijin bih is-soltu. Nagħmlilkom
kuraġġ. Kollox jgħaddi. Anke dan iżżmien
ikrah jgħaddi wkoll. Persważ li se
noħorġu b’saħħitna iktar minn qatt qabel.
San Pawl u Ħal Safi, żewġ ismijiet
li ma jistgħu jinħallu qatt. Issa ili sew
surmast direttur ta’ din il-banda. Kelli
x-xorti li niltaqa’ ma’ ħafna nies bravi
minn Ħal Safi u kollha kapaċi. Min jafni,
jien inkellem lil kulħadd, sew lil tal-armar, liż-żgħażagħ
u lil tan-nar. Inkellem ukoll diversi familji li jġibu t-tfal
tagħhom għat-tagħlim. Anke jekk minħabba l-pandemija
tħarbatna ftit, inħossni kburi ħafna f’dak li għamilna
f’dak li hu tagħlim tal-mużika. Nittama li malli jgħaddi
kollox dawk li kienu qed jitgħallmu jerġgħu jiġu jkomplu
minn fejn ħallew għax dak huwa l-periklu u r-riskju li
jista’ joħroġ minn din il-pandemija.
Għalhekk issa kif jgħaddi kollox se nitlob ftit
l-għajnuna tagħkom biex tinkoraġġixxu lit-tfal
tagħkom jerġgħu jirrankaw mill-ġdid fuq it-tagħlim.
Ma nistgħux nitilfu kollox dak li ilna tant żmien nibnu
flimkien. Irridu nagħmlu sagrifiċċju u kulħadd jagħmel
il-parti tiegħu. Lill-bandisti tagħna ngħidilhom biex
ma jabbandunawniex. Ipprattikaw kemm tistgħu d-dar
tagħkom, billi mqar tagħmlu noti twal li għalkemm
jidhru mhuma xejn, dawn huma importanti ħafna għallmużiċist.
Ngħaddi issa biex nitkellem fuq is-Soċjetà tagħna,
Banda San Pawl. Ma nieqaf qatt infaħħar lill-membri
tal-kumitat ta’ din is-Soċjetà li jaħdmu lejl u nhar sabiex
il-Banda San Pawl tkompli tikber. Proġetti bħalma
huma dawk tal-planċier u tat-tkabbir tal-każin mhumiex
ċajta. Għalhekk prosit tax-xogħol kbir li qed tagħmlu
għan-nies ta’ Ħal Safi. Il-poplu ta’ Ħal Safi għandu jkun
rikonoxxenti għal dak li qed tagħmel il-
Banda tagħna. Nitolbukom tkunu ġenerużi
fl-offerti tagħkom. Nappellalkom ukoll
biex min għandu l-ulied iressaqhom għattagħlim
tal-mużika. Għandna bżonn ta’
aktar bandisti. Il-futur tagħna jiddependi
mill-interess tagħkom in-nies ta’ Ħal Safi.
Din is-sena mhux se nkellimkom fuq
il-programm annwali li s-soltu ntellgħu
fil-pjazza fit-tieni jum tat-Tridu u dan
minħabba l-pandemija.
Kieku tkunu tafu kemm sagrifiċċji
jsiru biex intellgħu programm bħal dak!
Hemm ħafna affarijiet fin-nofs u li ma jidhrux għax isiru
kollha minn wara l-kwinti. Jien persważ li ħafna nies
indunaw xi kwalità ta’ programm mużikali qed intellgħu.
Qatt ma nqasna milli nagħtu opportunità biex bandisti
bravi minn Ħal Safi stess jesebixxu ruħhom f’parti
solista. Lill-bandist lokali dejjem bqajna nġibulu rispett.
Xejn ma ngħidilkom. Ibagħtu lil uliedkom jitgħallmu
l-mużika magħna.
Żgur mhux se jiddispjaċikom. Li ddoqq mal-banda,
barra li hija xi ħaġa sabiħa hija okkażjoni tajba fejn
wieħed jaħdem fi grupp u jitħallat man-nies, xi ħaġa
essenzjali ħafna fl-iżvilupp tal-bniedem.
Nagħlaq dan il-messaġġ billi nirringrazzja lil kulħadd
u lil dawk li jgħinuni fil-banda. Ħuti ma naqtgħux
qalbna. Meta San Pawl waqa’ minn fuq iż-żiemel u
għama, min jaf kemm kienet diffiċli għalih biex iqatta’
waħdu dawn il-jiem li firduh mil-laqgħa li kellu jkollu
ma’ Ananija minn Damasku. Pawlu qatta’ dawn il-jiem
fid-dlam imma l-kliem ta’ Ġesù baqa’ jidwi f’moħħu
wara d-dehra li kellu. Kien jaf li Ġesù ma kienx se jitilqu
waħdu u min jaf x’ferħ ħass meta Ananija, bis-saħħa ta’
Alla, reġa’ raddlu lura d-dawl. Hemmhekk Pawlu kellu
konferma li Ġesù kien tassew Alla, li dak li ġralu ma
kienx immaġinazzjoni. L-Aħwa nagħmlu kuraġġ. Aħna
wkoll bħal Pawlu se nerġgħu naraw id-dawl mill-ġdid.
Fil-jiem tal-festa
nħeġġu lil kulħadd biex jersaq
aktar lejn is-Sagramenti.
41