Ktieb Festa 2020, Każin Banda San Pawl Safi Ktieb 2020, Safi, Malta

Każin Banda San Pawl, Safi Festa 2020 tissemma Natasha Zhdanova, tfajla kuraġġuża li tant batiet taħt idejn Sergei Kourdakov u li għaliha jiddedika dan il-ktieb. Sergei beda jara l-ħajja minn lenti differenti meta waqt ikla li fiha kienu preżenti diversi kapijiet tal-Partit Komunista, intebaħ bl-ipokrezija li kienet teżisti. Fehem li l-għan ewlieni ta’ ħafna mill-kbarat kien li jilħqu u jistagħnew, u kienu jiġu għala biebhom mill-problemi tal-bqija tal-poplu. Sergei tilef dik il-ħrara li kellu lejn il-Komuniżmu u waħħalha f’moħħu li jistinka hu wkoll biex jilħaq bħall-oħrajn, u addio ideali! Lulju tal-1970 kellu jkun importanti fil-ħajja ta’ Sergei. Wara rejd li għamlu, huwa fettillu jitfa’ fil-but xi materjal li kienu kkonfiskaw mingħand l-Insara. Għamel dan bil-moħbi għax il-qari ta’ propoganda Kristjana kien projbit. Malli sab mument kwiet, ħareġ dawk il-karti u qagħad jaqra. Inzertat kitba meħuda mill-Vanġelu ta’ San Luqa. Oħroġ il-għaġeb, Sergei sab li dak il-materjal ma kellu xejn ħażin kontra l-Istat, anzi kien fih messaġġ ta’ mħabba u maħfra. Dik il-kitba messitlu qalbu u fih reġgħet xegħlet xrara ta’ umanità li mbagħad kellha twassal sabiex iħoss sogħba u jindem minn dak il-ħażen kollu li kien wettaq kontra l-Insara. Kien hawn li Sergei waħħalha f’moħħu li jibdel ħajtu. Iddeċieda li mal-ewwel ċans li jiġih jaħrab minn pajjiżu. Ipprova jagħmel dan għal darba tnejn, meta ppjana biex jaqsam għall-Ungerija u t-Turkija, iżda l-ħsieb fallielu minħabba fatturi li ma kellux kontroll fuqhom. Issa ma setax jibqa’ jaqdi lill-pulizija sigrieta. Qalilhom li ma xtaqx ikompli u xejn ma ħadu gost bih. Tawh ċans biex jeħles mill-istudji li kellu, iżda wissewh li kienu nvestew ħafna fih u ma kinux lesti li jħalluh jitlaq minn taħt idejhom kif ġieb u laħaq. Ma damx ma ggradwa bħala fizzjal fin-nejvi Sovjetika u ntbagħat fuq bastimenti navali biex jakkwista iktar esperjenza. Il-ħsieb li jaħrab baqa’ dejjem iberren f’moħħu. Sab ix-xoqqa f’moxtha meta kienu jinsabu qrib il-kosta Kanadiża, fl-oċean Paċifiku. Waqt maltempata qalila, huwa qabeż il-baħar u telaq bil-għawm lejn l-art. Kien nhar it-3 ta’ Settembru 1971. Ir-rakkont tal-ġlieda kontra l-qawwa tal-baħar u l-kesħa kbira jżomm lill-qarrej fuq ix-xwiek. Wara sigħat fl-ilma nġazzat huwa rnexxielu jasal fuq ix-xatt, mifni u mitruħ. Jgħid li rnexxielu jagħmel dan bl-għajnuna ta’ Alla li talbu u reħa ruħu f’idejh bla ma biss kien jafu. In-nies Kanadiżi ta’ Charlotte Island daru bih bi tjieba liema bħalha. Minn hemm ħaduh fi Prince Rupert fejn żammewh taħt sorveljanza fl-isptar. Bil-mod il-mod reġa’ rkupra saħħtu, imbagħad ħaduh Vancouver u Quebec. Kien hawn li feġġ il-periklu li setgħu jagħtuh lura f’idejn ir-Russi, iżda l-Providenza riedet mod ieħor. Sa fl-aħħar tawh id-dokumenti meħtieġa biex ikun jista’ jibqa’ jgħix il-Kanada, bħala immigrant politiku. Issa, li kiseb il-ħelsien, ried li jfittex u jsir jaf tabilħaqq min hu Alla. Ikkonverta u sar Kristjan ferventi. Ried li jiddedika ħajtu sabiex jikxef il-qerq tattmexxija Komunista u talab maħfra lil dawk l-Insara li kien tant ħaqar – speċjalment lil dik it-tfajla kuraġġuża – Natasha. Sergei xtaq juri, speċjalment liż-żgħażagħ tamparu, li Alla mhux biss jeżisti, iżda li Hu għandu s-setgħa li jbiddel il-ħajja ta’ kull min jinsab fit-triq ilħażina. Miet – jew inqatel – meta kien għoddu għalaq 22 sena, nhar il-1 ta’ Jannar 1973. Il-ġrajja ta’ Sergei Kourdakov nistgħu nqisuha waħda minn dawk il-ħoloq li sawru dik il-katina illi finalment waqqgħet il-Komuniżmu – dak il-Komuniżmu li kien moralment kif ukoll spiritwalment fallut. --------- --------- --------- -------- Il-qoxra talktieb Aħfirli, Natasha Nota tal-Editur: Il-ktieb Forgive Me, Natasha ġie maqlub għall-Malti minn Paul Callus. Inħeġġiġkom takkwistaw kopja ta’ dan il-ktieb li tassew juri l-qawwa tat-talb u l-konverżjoni. Jekk tabilħaqq minn din l-istorja rridu nieħdu lezzjoni Pawlina, nistgħu ngħidu illi kienet il-fidi ta’ Natasha Zhdanova li wasslet lil Sergei Kourdakov għat-Triq ta’ Damasku u l-Konverżjoni. Dik il-parti tal-ġrajja ta’ meta Sergei Kourdakov tela’ l-art Kanadiża, tfakkarna wkoll fin-Nawfraġju ta’ San Pawl f’Malta: Fiż-żewġ każi n-nies laqgħuhom bi ħġarhom, daru bihom, u tawhom dak kollu li kellhom bżonn. “Bonġu tfal, ftakru li Alla ma jeżistix” – silta minn diskors ta’ Mons. Angelo Comastri prelat ta’ Ruma u Arċipriet tal-Bażilika ta’ San Pietru. Nissuġġerilkom tisimgħu din il-priedka ta’ Mons. Angelo Comastri ‘La drammatica storia di Sergei Kourdakov (1951-1973). Da ateo comunista persecutore di cristiani a cristiano perseguitato e ucciso’. https:// www.youtube.com/watch?v=yV5f0iqqPeI 103

Ktieb Festa 2020, Każin Banda San Pawl Safi Ktieb 2020, Safi, Malta | Page 105