Ktieb Festa 2020, Każin Banda San Pawl Safi Ktieb 2020, Safi, Malta | Page 100

Festa 2020
Każin Banda San Pawl, Safi
Monreal u li wara sar il-Blue Star Bar. Illum din id-dar
m’għadhiex teżisti.
Żaren bata f’ħajtu. Kien iġorr il-ġebel biż-żiemel u
wara kien mar jaħdem it-Tarzna mal-Ammiral. Żaren
kien iħobbha dik il-pinta nbid. Filgħaxija, wara ġurnata
xogħol, l-uniku svog li kellu kien li jmur sal-ħanut taxxorb
tal-Ġelem fil-Pjazza, fejn illum hemm d-dar ta’
Ġemma. Il-ħanut kien fil-kamra ta’ barra fejn hemm ilbieb
bil-persjani. Kien imur mal-bank biex jordna pinta.
Però, minflok pinta nbid kien dejjem jgħid ”agħmilli
pinta żabgħa!” U x’ġara? Naturalment, baqgħetlu ta’
Żaren ta’ Żabgħa!
Iż-Żużża: Ġanmari Busuttil
Missier Ġanmari kien Ġorġ ta’ Makakka li meta
kien għadu ġuvni kien telaq lejn it-Tuneżija biex isib
ix-xogħol. Lura Ħal Safi kien iżżewweġ lil Katerin taċ-
Chalie u b’hekk twieled it-tifel Ġanmari. Xi żmien wara,
Ġorġ kien reġa’ rħielha lejn it-Tuneżija, din id-darba
mal-mara u t-tifel Ġanmari. Hemmhekk kellhom it-tieni
wild, Pija. Lura Ħal Safi, Ġorġ u martu kellhom it-tielet
wild, Ġużeppi t-Tuq.
Sadanittant, lil Ġanmari kienu jistaqsuh fejn kienu
joqogħdu fit-Tuneżija. Hu kien iwieġeb “Zuzza”. Għannies
kienet tinstema’ kelma stramba u malajr qalgħuhielu
‘Iż-Żużża’.
Li ma kinux jafu kien, li veru hemm belt, li tinstab
xi 140 kilometru ’l isfel mill-kapitali Tunis, jisimha
Soussa! It-Tuneżija kienet kolonja Franċiża u din il-belt,
il-Franċiżi kienu jsibuha u anki jippronunzjawha bħala
Sousse. Illum l-ekonomija ta’ Soussa tiddependi fuq ilproduzzjoni
taż-żejt taż-żebbuġ, it-tessuti, tagħmir tattrasport
u t-turiżmu.
Meta kiber, Ġanmari kien jaħdem fil-ġebel ma’
kuntrattur. Kien xtara trakk biex iġorr il-ġebel millbarriera.
Ħadem ukoll mal-Air Ministry fil-Karwija,
f’tarf Ħal Safi. Kien raġel b’saħħtu ferm. Darba minnhom,
ajruplan tas-servizz kien weħel sewwa ġot-tajn li b’xejn
ma setgħu jaqalgħuh. Iż-Żużża daħal għall-isfida, libes
harness ma’ sidru b’ċineg ħoxnin u b’saħħithom u
rnexxielu jċaqlaq l-ajruplan ’il barra mit-tajn!
Nota: Fejn il-laqam huwa ripetut, it-tieni wieħed huwa miktub blaċċent
ta’ Ħal Safi.
Taqsir tal-kliem: m = miżżewweġ/a.
Ringrazzjamenti: Karmena Farrugia m Cutajar tal-Maxku, Joseph
Zammit ta’ Marċjal, Rużar Farruġia, Pawlu Mifsud il-Postman, Paul
Callus, Żużu D’amato, Familja Busuttil tat-Tank, Sulina Monreal m
Zammit, Salvu u Pawla Dalli, Daniel Dalli.
98