Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi

Każin Banda San Pawl, Safi Festa 2019 Mill‑Pinna tal‑Editur Alexis Callus Il-Każin Banda San Pawl Safi huwa Soċjetà ħajja u attiva. Tagħti kontribut qawwi fil-qasam kulturali u soċjali fil- lokalità tagħna, kontribut li xi kultant jiġi sottovalutat. Fil-binja tagħha, ta’ kuljum, jiltaqgħu numru ta’ membri u ħbieb, li wara ġurnata xogħol isibu mument ta’ żvog, mistrieħ, jew spalla. F’dan il-bini jiġi diskuss ħafna, mit-temp u l-irwiegel, sal- gwerer u t-taqlib dinji, l-isport u l-ġrajjiet kurrenti, it-twelid, iż-żwieġ u l-imwiet… u fuq kollox il-festa ta’ Missierna San Pawl. Min jaf jekk dan kienx il-ħsieb ewlieni meta 90 sena ilu, f’Jannar tas- sena 1929, twaqqfet is-Soċjetà Każin San Pawl minn Pawlu Busuttil il-Fokli u Filomeno Cachia! Kien hawn illi ntlaqa’ l-Prim Ministru Boffa fl-1949 meta f’Ħal Safi kien inawgurat id-dawl elettriku, u fejn il-Ħal Safin iltaqgħu mal-Gvernatur Gerald Creasy. Kien hawn li sar ir-riċeviment f’ġieħ il-Prim Ministru George Borg Olivier fl-1962 wara li tpoġġiet l-ewwel ġebla tal- iskola tal-lokal. 30 sena ilu kien hemm żviluppi oħra f’din is-Soċjetà. F’Awwissu tal-1989 kien inawgurat il-bini l-ġdid tal- każin, u f’Diċembru ta’ dik is-sena l-Banda San Pawl Safi tat l-ewwel programm mużikali tagħha. Dan seħħ wara li f’Ottubru tal-1988 is-Surmast Tony Pace assistit mis-Sur Anthony Busuttil u s-Sinjura Sylvana Camilleri organizzaw l-ewwel lezzjonijiet. Il-Kumitat tal-Każin kien ħa ħsieb li jinxtraw l-istrumenti. Sal-lum, kull nhar ta’ Erbgħa, il-Kummissjoni Banda tieħu ħsieb torganizza lezzjonijiet b’xejn, għal dawk kollha li jixtiequ jitgħallmu strument u jissieħbu mal-banda. Dawn il-passi importanti għandhom jitfakkru u għandna nuru kull apprezzament lejn dawk illi ħasbu għal dan u għal dawk li llum qed ikomplu jsostnu u jżidu fuq dak li nżera’. Din is-sena, matul il-festa tal-Konverżjoni ta’ San Pawl fil-25 ta’ Jannar, festa li f’Ħal Safi tiġi ċċelebrata b’tant solennità, ġie mfakkar il-175 sena minn mindu l-istatwa titulari nħarġet għall-ewwel darba. Kapulavur ta’ Xandru Farrugia li flimkien mal-pedestall u l-bradella, xogħol ta’ Manwel Buhagiar, għadhom kif ġew irrestawrati b’mod professjonali matul dawn l-aħħar snin. Lokalità żgħira, iżda bi storja twila, dedikazzjoni u ħidma li twassal għal festa kompluta, u fuq kollox, għat- tkabbir u t-tixrid tal-kult Pawlin, li huwa evidenti f’kull rokna ta’ raħalna. Bis-saħħa ta’ din il-pubblikazzjoni matul is-snin, wieħed għandu ġabra tal- ġrajjiet ta’ din il-Għaqda. Hija l-intenzjoni tiegħi illi nkompli dan il-legat, għaliex huwa xieraq li dan il-kontribut jingħata l-għarfien li jixraqlu. Nixtieq nieħu din l-okkażjoni u nirringrazzja lill-Kumitat tal-Każin Banda San Pawl għall-fiduċja li wrew fija u li għal sena oħra talbuni biex inkun editur ta’ dan il-ktieb. Nirringrazzja wkoll lill- kontributuri kollha, b’mod speċjali lis-Sur Paul Abdilla li b’mod volontarju jagħmel il-qari tal-provi. Grazzi lill- istamperija Best Print tal-Qrendi li b’ħafna dedikazzjoni jipproduċu dan il-ktieb tant għal qalbna. Nifraħ ukoll lill-Kunsill Lokali l-ġdid ta’ Ħal Safi li kien elett fl-aħħar ta’ Mejju li għadda. Nawgura lis- Sindku s-Sur Johan Mula kif ukoll lil dawk eletti kollha biex ikomplu jaħdmu għal Ħal Safi u jkomplu jkunu ta’ appoġġ lil din is-Soċjetà. Bejn Diċembru u Jannar li għadda kelli l-opportunità nipparteċipa ma’ grupp ta’ persuni f’xogħol volontarju mat-tfal f’Elbasan u f’Pogradeč fl-Albanija. Din kienet esperjenza mill-isbaħ li nissuġġeriha lil kull min għadu m’għmilhiex. Matul din l-esperjenza ma naqsitx il- preżenza tal-Kbir Appostlu, li huwa wkoll mess ma’ din l-art fil-mixja evanġelika tiegħu. Billejl Pawlu kellu viżjoni; ra raġel mill-Maċedonja, wieqaf, jitolbu hekk, “Ejja l-Maċedonja u għinna.” [Atti:16:9] Pawlu sema’ l-kelma ta’ Ġesù, u minn Tessalonika mar lejn il-Maċedonja minflok lejn l-Asja. B’hekk qasam it-toroq tar-Rumani li kienu jwasslu mill-muntanji tal-Greċja lejn Pogradeč fl-Albanija u qasam il-lag ta’ Ohrid fejn kompla bil-missjoni tiegħu ta’ konverżjoni fl- Ewropa. Lil kull min għandu pożizzjoni ta’ poter, nappellalu biex juża l-kariga li għandu biex iwettaq il-ġid u jsaħħaħ il-komunitajiet tagħna, biex inkomplu nħeġġu lin-nies jipparteċipaw u jixprunaw it-tradizzjonijiet tagħna b’mod speċjali dawk kulturali. Huwa importanti li jkunu peżenti fejn ikun hemm il-bżonn, fejn ikun hemm is-sejħa, biex b’hekk jaraw li ħadd ma jibqa’ lura. Din ukoll hija l-missjoni tagħna, kulħadd imsejjaħ minn fejn qiegħed. Nawguralkom festa mill-isbaħ u qari mill-aħjar. Viva San Pawl! 90 Sena Soċjetà 1929-2019 30 Sena Banda 1989-2019 175 Sena Statwa Titulari 1844-2019 5

Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi | Page 7