Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi

Każin Banda San Pawl, Safi Festa 2019 Ma nħallux li jintilef il‑valur Nisrani mill‑festi tagħna Carmel Callus Viċi President tal-Każin tal-Banda San Pawl Din is-sena, il-festa f’ġieħ l-Appostlu Missierna San Pawl fir-raħal tagħna għandha tifsira speċjali peress li qed niċċelebraw il- 175 sena minn mindu l-vara artistika ta’ San Pawl waslet fostna u ħarġet għall-ewwel darba proċessjonalment fit-toroq tar-raħal tagħna. Jien ilni mas-60 sena involut b’xi mod jew ieħor f’din il-festa tant għażiża għalija, l-ewwel bħala abbati fl-ewwel snin ta’ ħajti fi żmien il-wisq maħbub kappillan Mons Dun Bert Bezzina, imbagħad b’involviment dirett fil-knisja tul it-tmexxija ta’ għadd ta’ kappillani oħra li kellna fostna mill-bidu tas-snin sittin ’l hawn, b’mod partikolari l-Kappillan Dun Karm Lia li kellu post speċjali f’qalbu għal Ħal Safi u l-komunità Ħalsafija u li miet waqt li kien għadu jservi fir-raħal tagħna. Għadni niftakar il-festa ssir fil-ġurnata liturġika tagħha, jiġifieri fil-25 ta’ Jannar, meta, bħala tfal, konna nieħduha ġurnata vaganza mill-iskola biex inkunu nistgħu nieħdu sehem fil-quddiesa solleni ta’ filgħodu. U meta kien jagħmel il-maltemp, tistgħu taħsbu xi dwejjaq kien jaqbadna għaliex avolja l-purċissjoni kienet issir fl-ewwel Ħadd ta’ wara, jekk it-temp kien jippermetti, ma konniex inħossu dak l-ispirtu li konna nħossu fil-jum proprju tal- festa. Dak iż-żmien ma kienx isir ix-xalar li qed isir illum. Qalbna kienet marbuta mal-festa reliġjuża. Ħafna, kbar u żgħar, konna nattendu l-attivitajiet kollha li kienu jsiru fil-knisja u anki nieħdu sehem fihom. Inklużi t-tridijiet fejn konna nitgħaxxqu nisimgħu l-mużika ta’ Maestro Paolo Nani bl-orkestra tkun immexxija minn qarib ta’ Paolo Nani, bl-istess isem. Il-festa, għalina, kienet tfisser L‑E.T. Mons Arċisqof Charles Scicluna waqt iż‑żjara riċenti tiegħu f’Ħal Safi. Fir‑ritratt jidher il‑Kappillan Kan Dun David Farrugia u tfajjel. li ngħaddu ġimgħa madwar San Pawl bħala l-patrun tagħna. Maż-żmien, il-festa kompliet tikber. L-aktar fil-festi esterni. Biex b’hekk, sfortunatament, beda jintilef il-valur reliġjuż tal-festa. Jien m’għandi xejn kontra l-festi esterni, imma naħseb li ħafna l-lum qed iħarsu lejn il-festi bħala biss mezz ta’ xalar. Li ma għandux ikun. Hemm ħafna li b’xi mod jew ieħor jagħtu sehem attiv għall-festa imma jiddispjaċini ngħid li ftit biss minnhom li għall-anqas fil-ġimgħa tal- festa jersqu lejn il-knisja biex jagħtu qima lil dak li suppost ikunu qegħdin jiċċelebraw b’mod attiv il-festa tiegħu. Hemm bżonn li għallanqas matul il-ġimgħa tal- festa nuru bil-fatti li tabilħaqq nemmnu f’San Pawl u li tabilħaqq inħobbuh. Dan mhux billi fl-aħħar jum tat-tridu mmorru ngħajtu ħafna eloġji quddiem l-istatwa ta’ fuq iż- żiemel, għax dan ma jfisser xejn meta lanqas biss nersqu lejn l-Istatwa li ilha fostna 175 sena. Ejjew naħdmu flimkien biex inżommu l-festi bħala festi Nsara. Bil-fatti u mhux bil-paroli u t-twerżiq. Xieraq għalhekk li nirriferi għal diskors li għamel dan l-aħħar, permezz tal-mezzi soċjali, Mons Arċisqof Charles Scicluna, fejn appella biex filwaqt li niċċelebraw u nieħdu pjaċir bil-festi tal-qaddisin, ma ninsewx li l-festi għandhom narrativa reliġjuża. Mons Arċisqof qal li l-valuri Kattoliċi għandhom ikunu preżenti fil-festi b’mod speċjali fil-mod kif nitkellmu fuq xulxin għaliex dan jiddetermina jekk hux qed niċċelebraw il-festi ta’ Nsara jew ta’ pagani. L-Arċisqof esprima l-inkwiet tiegħu meta fil-festi ż-żgħażagħ jiltaqgħu mad-droga għall-ewwel darba. Qal li min qed iressaq din it-tentazzjoni lejn iż-żgħażagħ għandu jħallas quddiem il-ġustizzja ta’ Alla. Huwa stqarr: “Jien tinkwetani ħafna meta nisma’ li ż-żgħażagħ tagħna qegħdin jiltaqgħu mad-droga għall-ewwel darba fil-festa tal-qaddis. Dan ma jagħmlilniex unur. U min liż-żgħażagħ tagħna jagħtihom din it-tentazzjoni, irid iħallas quddiem il-ġustizzja t’Alla. “Jiena nibża’ meta naħseb kemm inkwiet ikollhom il-ġenituri meta ż-żagħżugħ joħroġ għall-marċ, mingħalihom, u jidħol imdamdam. Għidli inti, tkun omm u missier, x’jibqa’ fik. Iħassarlek il-festa, kif ngħidu. ‘Aħna tħassarlix il-festa!’ Imma aħna hekk qed nagħmlu lil xulxin bis-sokor u bit-tħabrit, li ma jixraqilniex. Aħna tajjeb li niċċelebraw u niddevertu imma hemm mod u mod kif tagħmilhom,” kompla l-Arċisqof filwaqt li awgura lil kulħadd biex il-festi tagħna jibqgħu festi sbieħ li fihom niċċelebraw u tassew nifirħu flimkien. 90 Sena Soċjetà 1929-2019 30 Sena Banda 1989-2019 175 Sena Statwa Titulari 1844-2019 57

Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi | Page 59