Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi

Każin Banda San Pawl, Safi Festa 2019 Kummissjoni Banda San Pawl Emmanuel Zahra Għeżież Pawlini Ħal Safin, huwa ta’ unur għalija li qed nerġa’ naqsam il-ħsibijiet tiegħi magħkom għal sena oħra f’dan l-ispazju provdut lili f’din il-ħarġa tal-ktieb tal-festa ad unur il-Kbir Appostlu Missierna San Pawl. Li tkun delegat tal-banda llum saret biċċa wġigħ ta’ ras kbira, u dan ma ngħidux jiena waħdi, imma kull delegat tal-banda huwa tal-istess ħsieb. Bħas-snin ta’ qabel, is-sehem prinċipali tal-banda tagħna fil-festa jkun il-programm vokali u strumentali tal-Ħamis filgħaxija fil- ġimgħa tal-festa fuq il-planċier artistiku tagħna armat fil- pjazza. Dan il-programm jirrikjedi ħafna ħsibijiet, xogħol u preparamenti, u għaldaqstant nixtieq nirringrazzja ħafna lill-bandisti tal-post kif ukoll lill-bandisti barranin għas- servizzi kollha li jagħtu matul il-ġimgħa tal-festa kif ukoll matul is-sena. Nixtieq nappella lil dawk kollha li jagħtu s-sehem tagħhom biex ikomplu jkunu ta’ għajnuna fil- bżonnijiet ta’ matul il-festa u nawguralhom aktar saħħa biex ikunu jistgħu jagħtu s-sehem tagħhom bl-aħjar mod. Fil-preżent għandna seba’ aljievi jitgħallmu strument mal-banda. Lil dawn nawguralhom kull suċċess. Nixtieq u nħeġġeġ aktar żgħażagħ jersqu lejn il-każin sabiex jagħtu daqqa t’id fil-ħtiġijiet li jkun hemm bżonn, u ta’ dan nirringrazzjahom bil-quddiem. Din is-sena l-Banda San Pawl tagħlaq 30 sena mill- fondazzjoni tagħha. Bħas-snin ta’ qabel il-banda kellha diversi servizzi kemm f’Ħal Safi kif ukoll fi bliet u rħula oħra. Fit-30 ta’ Diċembru sar is-servizz tal-Milied fejn indaqqew diversi melodiji marbutin ma’ dak il-perjodu tas-sena, u fil-25 ta’ Jannar tajna sehemna fiċ-ċelebrazzjoni tal-festa liturġika ta’ San Pawl fl-okkażjoni tal-175 sena tal- miġja fostna tal-vara titulari ta’ San Pawl f’Ħal Safi. Fis- 7 ta’ Lulju l-banda tat servizz waqt il-festa ta’ San Pawl Martri fir-Rabat Malta u fl-4 ta’ Awwissu waqt il-festa ta’ San Pietru fil-Ktajjen f’Birżebbuġa. Fis-17 ta’ Jannar il-banda daqqet waqt il-funeral tal- mibki Joseph Callus, eks President, Membru Onorarju kif ukoll ċentrali fil-ħidma tan-nar għal diversi snin. Nixtieq nirringrazzja lil sħabi kollha tal-kumitat ċentrali u tas-sottokumitati, lill- bandisti tal-post u dawk li jiġu minn barra ta’ kull sena biex iferrħuna bid-daqq tagħhom. Insemmi bi prominenza lill-bravu Surmast Mro Michael Bugelli, l-Assistent Surmast is-Sur Charles Wallace Suda u lill-Konsulent tal-Banda s-Sur Saviour Spiteri tal-impenn tagħhom fix- xogħol li jagħmlu mal-banda San Pawl. Nagħmel referenza wkoll għall-kummissjoni planċier ta’ dak kollu li qed jagħmlu b’risq din l-opra tant għal qalbna. Grazzi wkoll lill- Kappillan, il-Kan. Dun David Farrugia, għall-ħidma tiegħu fil-parroċċa li hija tant siewja, kif ukoll lil dawk il-qassisin li jassistuh. Nawguraw lis-Surmast fundatur tal-Banda San Pawl, is-Seminarista Tony Pace fil-mixja spiritwali tiegħu lejn is-saċerdozju, kif ukoll lid-direttur spiritwali tagħna Dun Karm Zammit li dejjem jitlob għalina. Apprezzament imur lill-kunsill lokali mmexxi mis- Sindku s-Sur Johan Mula u lill-kunsillieri kollha, lill- pulizija li jassistuna fil-festa u li jżommu l-ordni, lis-soċjetà ċivili kollha li mingħandhom dejjem sibna koperazzjoni mill-aqwa. Grazzi kbira tmur lis-soċji tas-socjetà tagħna li għal dawn l-aħħar 90 sena taw kontribut kbir lill-festa f’ġieħ l-Appostlu Missierna San Pawl. Lilkom illum membri u residenti, grazzi tal-appoġġ tagħkom matul is-sena kollha, bl-għajnuna tagħkom u bil-finanzjament tagħkom. Nawgura l-festa it-tajba lil kulħadd. O Kbir Appostlu itfa’ l-barka, itfa’ s-sliema fuq uliedek Ħal Safin. Viva San Pawl! Il‑Banda San Pawl Safi mal‑Kumitat Ċentrali waqt il‑festa ta’ San Pawl ir‑Rabat (Malta) 90 Sena Soċjetà 1929-2019 30 Sena Banda 1989-2019 175 Sena Statwa Titulari 1844-2019 41

Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi | Page 43