Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi

Każin Banda San Pawl, Safi Festa 2019 Mill‑Maħżen tal‑Armar mill-Kummissjoni tal-Armar Għeżież Pawlini, waslet festa oħra f’ġieħ il- patrun għażiż tagħna. Din is-sena hija iktar importanti minħabba li qed niċċelebraw tliet anniversarji importanti għalina. Minn sena għal sena l-grupp tal-armar jibqa’ għaddej bil-ħidma tiegħu. Bħas-snin l-imgħoddija konna impenjati bl-attivitajiet. Għal żmien il-Milied ħadna ħsieb li narmaw il-pjazza u t-toroq tas-soltu. Din is-sena, b’kollaborazzjoni mal-Kunsill Lokali u Vince Cutajar, żdied aktar armar tal-Milied madwar id-dawra tal- pjazza. Għal żmien il-Milied tellajna wirja ta’ presepju rustiku fil-katina tal-każin. Żammejna l-appuntament annwali tagħna biex għas-sitt sena konsekuttiva tellajna l-wirja marbuta mal-Ġimgħa l-Kbira ġewwa ċ-ċentru parrokkjali. Grazzi kbira lill-esibituri kollha li ħadu sehem. Għat-tielet sena, flimkien mas-sezzjoni Żgħażagħ Pawlini u Safi Drama Group, tellajna l-Via Sagra Animata bl-isem Triq tal-Imħabba mat-toroq ta’ Ħal Safi. Matul din is-sena, is-Sur Charles Polidano organizza tliet ikliet ġewwa Montekristo Estates bħala parti mill-ġbir ta’ fondi, fejn parti mill-qligħ mar għax-xogħol li qed isir ġol-maħżen. Il-ħidma ġol-maħżen ma tieqaf qatt. Din is-sena tkompla x-xogħol fil-maħżen tal-armar sabiex ikollna aktar spazju għall-armar il-ġdid li qed inżidu. Kif għaddiet il-festa tnaddfet il-bitħa tal-maħżen mill-ħaxix ħażin u bl-għajnuna ta’ Polidano Group u Saviour Grixti ngħatat kisja konkos. Ħadna wkoll ħsieb biex issir kċina, grazzi għal Saviour Grixti għall-għajnuna tiegħu biex sar ix-xogħol meħtieġ. Din is-sena nbidlet il-liedna ta’ Triq l-iskola, kif ukoll saret manutenzjoni ta’ xi festuni. Komplejna nibdlu d-dawl tal-knisja għal bozoz LED. Din is-sena biddilna l-bozoz tal-koppla u l-kampnar u b’hekk issa d-dawl estern tal-knisja inqaleb kollu għal LED. Din is-sena saret ukoll manutenzjoni fuq il-lifter tal-Soċjetà, grazzi għal Mario Camilleri tax-Xambekk. Is-sena l-oħra, 2018, bħala parti miċ-ċelebrazzjonijiet tal-25 sena mill-miġja ta’ San Pawl fuq iż-żiemel, inawgurajna waħda mis-sett ta’ erba’ bandalori, disinn u sfumar ta’ Albert Borda u ħjata ta’ Tessi Magri. Dawn il-bandalori se jkunu qed jirrappreżentaw l-erba’ isqfijiet marbutin mal-parroċċa tagħna. Dan il-proġett se jkun qed isebbaħ Misraħ San Ġużepp minn fejn tgħaddi l-purċissjoni. Matul din is- sena tkompla u tlesta x-xogħol fuq dawn il-bandalori. Bħala parti mill-anniversarji li qed niċċelebraw din is- sena ħdimna fuq sorpriża li se tkun qed tinkixef fil-marċ tal-aħħar tridu disinn, bi sfumar ta’ Alan Xerri u ħjata ta’ Tessi Magri, li se tkompli tikkumplimenta mal-armar li għandna. Tkompla x-xogħol fuq il-planċier artistiku, fejn il-bronż tal-faċċata wasal fi stat avvanzat sewwa. Intemmu dan il-messaġġ billi nħeġġu aktar nies sabiex jingħaqdu ma’ din il-familja Pawlina. Inħeġġukom ukoll sabiex matul il-ġimgħa tal-festa tarmaw il-faċċata tad-djar u l-arbli tagħkom. Fuq kollox nirringrazzjaw lill-voluntiera u l-benefatturi kollha li joffru l-ħin u l-għajnuna tagħhom meta jkollna bżonn. Nirringrazzjaw ukoll lill-kappillan, lill-membri tal-kunsill lokali, lill- kumitat ċentrali u sezzjonijiet l-oħra fi ħdan is-Soċjetà Pawlina. Nagħlqu dan il-messaġġ billi nirringrazzjaw lilkom Ħal Safin li dejjem tattendu għall-attivitajiet tagħna matul is-sena u nħeġġukom sabiex tingħaqdu magħna fil-festa f’ġieħ l-Appostlu Missierna San Pawl. Il-festa t-tajba! Viva San Pawl! Il-Kumitat tal-Festa Każin San Pawl jinkoraġġixxi t-tiżjin ta’ gallariji u bjut fil-ġranet tal-festa. 90 Sena Soċjetà 1929-2019 30 Sena Banda 1989-2019 175 Sena Statwa Titulari 1844-2019 29

Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi | Page 31