Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi

Każin Banda San Pawl, Safi Festa 2019 Jikteb il‑Kaxxier Martin Zammit Il-festa reġgħet magħna. Din hija l-wieħed u għoxrin darba li qed niktbilkom fil-kariga ta’ kaxxier tal-Każin Banda San Pawl Ħal Safi. Dawn jingħaddu flimkien ma’ snin oħra fejn kont attiv fil-każin u fejn rajt ħafna żviluppi pożittivi b’risq il-festa. Din is-sena b’mod partikolari qed infakkru d-90 sena minn mindu twaqfet is-Soċjetà tagħna kif ukoll 30 sena mit- twaqqif tal-Banda San Pawl u tal-bini mill- ġdid tal-Każin. Taħbat ukoll il-175 sena fostna tal-istatwa tant għal qalbna meqjuma fil-knisja tagħna, dik li ġġib ix-xbiegħa tal-Appostlu Missierna San Pawl, ta’ dak iż-żagħżugħ tassew qalbieni mibgħut minn Alla. Li b’tant kapaċità tal-artist u tar-restawraturi llum qegħdin ingawduh fl-aqwa tiegħu. Dawn il-ġrajjiet li qed infakkru huma tant għeżież għalina l-Ħal Safin. Illum aħna qegħdin inkomplu fuq passi missirijietna u qed naraw kif insostnu u nżidu ma’ dak li ħallewlna. Bħal fl-imgħoddi, illum ukoll, dan huwa biss possibbli bl-għajnuna finanzjarja tagħkom u ta’ dawk il-benefatturi li tant irrid nuri apprezzament lejhom. Il-ħidma tal-kumitat u tal-għaqdiet tas-Soċjetà huma vitali biex nibqgħu mexjin ’il quddiem. Inħossni kburi li dejjem irnexxielna niftiehmu fl-aħjar interess ta’ kulħadd biex sena wara sena qed norganizzaw ċelebrazzjonijiet aktar organizzati fil-jiem tal-festa. Inħeġġeġ biex aktar żgħażagħ jissieħbu bħala soċji mas-Soċjetà tagħna għaliex hija bis-saħħa tas-sehem tagħhom li l-futur tal-każin ikun garantit meta dawn jiġu biex jieħdu postna fit-tmexxija tiegħu. Għax, wara kollox, aħna m’aħniex hawn għal dejjem. Kull Pawlin, kull resident ta’ Ħal Safi, għandu jħoss ġibda lejn l-Appostlu Missierna San Pawl. Is-sħubija hija miftuħa għal kulħadd, u dan huwa mod ieħor ta’ kif tistgħu tkunu ta’ għajnuna lil dan il-każin. Ejjew insaħħu dan il-wirt li ħallewlna missirijietna. Nirringrazzja lis-sottokumitati tas- Soċjetà tagħna li kollha huma ħabrieka fil- ħidma tagħhom u li bis-saħħa tagħhom jinġabru ħafna fondi u ssir ħafna ħidma b’risq il-festa. Nappella li tużaw is-servizzi tal-benefatturi tagħna u ta’ dawk li jagħtu appoġġ u riklamar f’dak kollu relatat mas-Soċjetà. Meta tużaw is-servizzi tal-Banka tal-Lottu fi Triq l-Iskola tkunu qegħdin tgħinu lill-Każin tagħna wkoll. Jekk nibqgħu nsaħħu din il-katina, jiena ċert li fis- snin li ġejjin inkunu nistgħu tassew insostnu l-attivitajiet tagħna u nkomplu nkabbru l-festi li nagħmlu. Appell li naf li se tirrikorru għalih; komplu għinu fil-fondi relatati mal-planċier u mal-investiment tal-bini tal-każin. Dawn huma żewġ ġojjelli li tistgħu taraw, tapprezzaw u tgawdu lkoll. Dawn huma kollha wirt il-Ħal Safin. 90 sena minn hawn, il-werrieta tagħna ser isibuhom, igawduhom u jifirħu bihom bħalma aħna nagħmlu llum. Din hija t-tradizzjoni tagħna, ejjew nindukraw lil uliedna biex fil-futur ikunu huma li jkomplu jgħoddu s-snin ta’ din is-Soċjetà u tal-wirt Pawlin ta’ dan ir-raħal. Nawguralkom festa mimlija saħħa u ferħ. Viva San Pawl! O San Pawl ħarisna dejjem, ibqa’ żommna magħqudin Int ir-ragħaj li tieħu ħsiebna, int patrun ta’ Ħal Safin. 90 Sena Soċjetà 1929-2019 30 Sena Banda 1989-2019 175 Sena Statwa Titulari 1844-2019 17

Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi | Page 19