Ktieb Festa 2019, Każin Banda San Pawl Safi Ktieb Festa 2019, Każin Banda San Pawl Safi | Page 127

Każin Banda San Pawl, Safi
Festa 2019
Passi & Beyond: Albanija
Alexis Callus u Joanna Abdilla
“Ma negħjew qatt nagħmlu l-ġid.” [Gal 6:9]
San Pawl minn dejjem kien ta’ spirazzjoni għalina;
kliemu jsaħħu l-mixja ta’ ħajjitna.
Matul il-vaganzi tal-Milied u l-Ewwel tas-Sena
ngħaqadna ma’ grupp ta’ volontiera mmexxija mill-NGO
Passi & Beyond bl-iskop li nwettqu xogħol volontarju
fl-Albanija.
Fl-Albanija qattajna jiem nassistu komunità
missjunarja li toffri servizz lil tfal abbandunati jew foqra,
kif ukoll familji fil-bżonn. Sajjarna għal madwar 100
persuna, u wara żorna diversi familji foqra, emarġinati u
anke fiżikament imbiegħda miċ-ċentri tal-bliet. Tellajna
diversi materjal edukattiv magħna u żejjinna xi klassijiet
li jintużaw minn dawn it-tfal. Esperjenza sabiħa ħafna
kienet fir-raħal ta’ Peqin (tinqara Peċin). Fis-sempliċità
u fil-faqar tal-post ingħatajna l-isbaħ lezzjoni fil-ħajja;
l-apprezzament u t-tama. Diffiċli nispjegaw fi ftit kliem,
iżda hemm sibna l-paċi f’qalbna, u nsejna għalkollox
li konna qed nagħmlu disat ijiem ta’ festi reqdin fuq
kutra mal-art. Ħassejna li hemm konna qed nagħmlu
differenza.
L-esperjenza laqqgħatna ma’ grupp ta’ Maltin
formidabbli li magħhom qattajna mumenti kemm sbieħ u
ta’ tensjoni. Huma kienu barka għalina f’dawk il-jiem u
m’aħna ser ninsewhom qatt. Melanie Scicluna, Michael
Azzopardi, Joseph u Eleanor Zahra, Maria Mifsud,
Aileen Agius u Mauro Cassar. Fil-memorja jibqgħu
wkoll il-missjunarji Albaniżi li qed jiddedikaw ħajjithom
għal dawn il-persuni. Inżommuhom fit-talb tagħna.
L-esperjenza aħħarija kienet waħda ferm differenti
minn dik li stennejna. Ta’ min ngħidu li l-għaqda Passi &
Beyond hija ferm organizzata u mexxew il-proċess kollu
bi professjonalità kbira f’kull ħin. Nappellaw lil kull min
jitħajjar jagħmel esperjenza simili li jikkunsidra jagħmel
dan magħhom.
Il‑Pont Golik (Pogradeč, Albanija)
“…bil‑qawwa tas‑sinjali u l‑mirakli, bil‑qawwa ta’ l‑Ispirtu
ta’ Alla. Hekk permezz tiegħi seħħ ix‑xandir ta’ l‑Evanġelju
ta’ Kristu minn Ġerusalemm u l‑inħawi ta’ madwarha
sal‑Illirja. [Rum 15:19]
F’din l‑ittra lir‑Rumani San Pawl jagħmel riferiment
għall‑Illirja, li fi żmien l‑Appostlu Pawlu kienet tinkludi
wkoll it‑territorju tal‑Albanija tal‑lum.
San Pawl, bħal bosta persuni illustri oħra tal‑imgħoddi
bħal Cesri u Napuljun, qasam dan il‑pont waqt il‑missjoni
ta’ evanġelizzazzjoni tal‑Lvant tal‑Ewropa.
(Ritratt ta’ Aileen Agius)
90 Sena Soċjetà 1929-2019
30 Sena Banda 1989-2019
175 Sena Statwa Titulari 1844-2019
125