NOTISIA
KOLABORASHON ENTRE Defensor di Pueblo i FUNDASHON pa KonsumidÓ
Ta huntu nos tin ku trese solushon pa e habitantenan di Tera Kòrá ku a sufri daño material na nan aparatonan elektróniko
Den luna di yüni 2014 Fundashon pa Konsumidó a sinta na mesa ku Ombudsman (Defensor di Pueblo) di Kòrsou pa asina trata pa konhuntamente yega na un solushon, pa primeramente habitantenan di e bario de Tera Kòrá. Ya pa algun aña kaba habitantenan di e bario di Tera Kòrá ta haña nan mes konfrontá ku e fenómeno ku nan aparatonan elektróniko ta kima pa motibu ku e koriente suministrá ta kousa daño na nan aparatonan. Algun di e habitantenan aki a aserká Aqualectra pa pidi kompensashon pa e daño material. Sinembargo despues di a aserká Aqualectra i a yena un formulario indikando nan daño, nan a risibí un karta na kas bisando ku Aqualectra no ta para responsabel pa e daño pa motibu ku segun Aqualectra e daño a wòrdu kousa dor di un orígen deskonosí. Den e mesun karta Aqualectra a referí nan na artíkulo 28 di su Kondishonnan General ku ta kontené un klóusula di eksonerashon.
Artíkulo 28 di e Kondishonnan General di Aqualectra/ E klóusula di eksonerashon
E klóusula aki, menshoná den artíkulo 28, ta enserá ku Aqualectra no ta para responsabel pa ningun daño, ku eksepshon di daño ku ta resultado di un akto intenshonal òf negligensha serio di parti di Aqualectra. Despues di a risibí diferente keho tokante e asuntu aki e dos organisashonnan ya menshoná a sinta huntu i a disidí di hasi un yamada riba tur konsumidó ku a wòrdu perhudiká pa nan tuma kontakto ku Fundashon pa Konsumidó òf Defensor di Pueblo di Kòrsou. Fundashon di Konsumidó i Defensor di Pueblo ta di opinion ku na momentu ku un distribuidor pa añanan ta na altura di un defekto ku ta okashoná ku e koriente ku e ta suministrá na su klientenan ta kousa daño na propiedat di e kliente aki, e distribuidor tin e obligashon di buska un solushon pa remediá e problema aki. Miéntras e distribuidor no buska un solushon permanente pa e problema e suministro di koriente ta keda kousa problema na e aparatonan di e klientenan. E último kehonan ku Fundashon di Konsumidó i Defensor di Pueblo a risibí ta indiká ku na Tera Kòrá tin un problema struktural.