Mi tabata enbolbí den un aksidente i seguro a deklará mi outo “total loss”. Ki mi por hasi?
Kompanianan di seguro tin 2 motibu pa deklará un outo “total loss”:
E outo tin asina tantu daño ku ya no por drecha esaki. Den kaso asina nos ta papia di “total loss” tékniko. Tambe por ta ku e gastunan pa drecha e outo ta mas ku e balor aktual di e outo. Esaki ta konosí komo “total loss” ekonómiko.
E balor di e outo ta wòrdu determiná segun e edat di e outo i e kondishonnan bou di kua a sera e seguro di outo. Den kaso di outonan nobo, seguro ta balorá e vehíkulo segun e balor di agensia (nieuwwaarde). Pa outonan mas bieu ta usa e balor aktual (dagwaarde).
Un outo ku keda deklará “total loss” ainda tin balor. Esaki ta e balor ku e tin ora bende esaki komo chatara (wrak). Den kasonan asina, seguro ta paga un montante igual na e balor aktual di e outo kitando e balor di e chatara. Ehèmpel: balor aktual di e outo ta fl. 5000,00. Balor di e “wrak” ta keda balotá na fl. 2570,00. Seguro lo duna asegurado fl. 2430.00.
Den kaso ku un konsumidó no ta satisfecho ku e montante ku e kompania di seguro ke paga, e tin 2 opshon:
Buska un kontra ekspertisio
Laga hasi un di 2 evaluashon di kaso. Chèk riba merkado ki balor un outo igual tin i laga hasi un balotashon di nobo kuantu e chatara lo kosta. Ku e informashon aki bo por aserka e kompania di seguro i purba renegoshá un mihó montante pa e outo.
Reparashon
Si e vehíkulo a keda deklará “total loss”, pero ainda esaki por wòrdu drechá, un konsumidó por keda ku e outo, òf loke a sobra di esaki. Den kaso ku e montante ku seguro kier paga no ta kubri tur e gastunan di reparashon, e konsumidó por presentá un kontraproposishon, den kua un mekániko ta indiká por eskrito, den forma di un presupuesto, kuantu e ta estimá ku lo sali pa drecha e outo. Den kasonan asina, sigur si ta trata di outonan di edat, ta rekomendabel buska piesanan segunda mano, after market òf na sloperij pa tene e presupuesto di reparashon mas abou posibel. Ku esaki bo por aserká e kompania di seguro i wak kon por renegoshá un mihó montante pa drecha e outo.
pregunta di luna
sabi