Den kolaborashon ku:
Diferensianan di preis mínimo
Apesar ku hopi konsumidó sa reklamá i hasi denunsia di e diferenshanan di preis entre rèki i kaha nos por bisa ku e diferenshanan konstatá no tabata di índole tan grandi. Diferensha den e suma total ku bo ta paga riba un total di 200 shen pa 400 florin di kompra ta den kasi tur kaso mínimo i den kasi tur kaso ménos ku 1 florin. Tambe nos ta mira den e investigashon aki ta ku diferenshanan den preis di rèki i na kaha tambe sa ta den bentaha di e kumpradó. Pues sa pasa ku e preis den na kaha ta mas abou ku e preis den rèki. E diskrepansia entre preis den rèki i na kaha ta di hopi influensha riba komparashonnan di preis ku Fundashon pa Konsumidó ta publiká ya ku nos fundashon ta hasi su komparashonnan solamente a base di preisnan den rèki.
Di e 7 supermerkadonan ku Inspekshon Ekonómiko a inspekshoná den e investigashon aki Centrum Piscadera a resaltá pa diferente motibu. Ku un porsentahe di 41% di produktonan ku ta diferenshá di preis , Centrum Piscadera ta resaltá komo e supermerkado ku mas diferensha entre preisnan di rèki i na kaha. Tambe Centrum Piscadera ta resaltá komo e supermerkado ku e diferensha di preis di mas haltu (fl. 4,03) pa un produkto. Hopi di e sobrá diferenshanan ta mínimo i kasi semper ta ménos ku un florin.
Porsentahe di diferensha den preis
Ya ku no na tur supermerkado e kantidat di artíkulo kompará ta igual nos a hasi un análisis di e porsentahe di artíkulo di kua e preis den rèki ta varia di esun na kaha. Den e tabèl siguiente por mira e kantidat di produkto selektá i kompará, e kantidat di artíkulonan ku diferensha di preis i esaki saká den porsentahe di e total di produktonan kompará den kada supermerkado. Aki sigur tin di remarká ku na Esperamos Supermarket un selekshon mas chikitu di produkto a keda kompará. Esaki por a influenshá e resultado di tantu forma negativo i positivo. Den e kaso aki e diferenshanan di preis tabata ménos loke a resultá den un resultado hopi positivo pa Esperamos (5% di diferensha).
E tabèl di e produktonan kompará lo keda publiká riba wèpsait di Fundashon pa Konsumidó. Por yega na esaki via e lenk aki [komparashon di preis di rèki i di skèn den supermerkado].
KOMPARÁ I KUMPRA